Den Bijbel Huan 10: 16, ta bisa : “Mi tin otro carne tambe, cu no ta den e cura aki. Esakinan tambe Mi tin di guia y nan lo scucha Mi boz y lo bira un cura y un wardador.” Akinan Hesus ta bisa bon cla, cu tin hendenan cu no ta den e Iglesia aki. Nan tambe tin di wordo guia, evangelisa y nan tur lo drenta den un solo Iglesia y nan lo tin un solo wardador di Iglesia. Awor, ta ken ta e un wardador di Iglesia aki na mundo? Den Bijbel Huan 21: 15-17, ora cu Hesus a bisa Pedro, duna Mi lamchinan di come, cuida Mi carnenan y duna Mi carnenan di come. Esaki ta significa, cu Pedro ta encabesa y ta representante di Cristo Su Iglesia, pa dirigi den predicashinan, pa duna ensenjansanan, pa evangelisa, pa administra e doctrinanan di Sacramentonan y pa guia e Iglesia di Cristo-Hesus. Awor, si nos lesa Bijbel Mateo 16: 15-19, na unda Cristo-Hesus a bisa Simon Pedro: “Abo ta Pedro (osea baranca) y riba es baranca aki, lo Mi lanta Mi Iglesia y forsanan di fierno lo no podera di dje. Lo Mi duna bo e yabinan di Reino di Cielo y loke bo prohibi na tera, ta prohibi den Cielo tambe y loke bo permiti na tera, lo ta permiti den Cielo tambe.” Compronde bon, ora cu Hesus a duna Simon e nomber Pedro, cu ta significa baranca, esaki kiermeen cabes visibel di Cristo-Hesus Su Iglesia. Ora Hesus a duna Pedro e yabinan di Reino di Cielo, esaki ta significa cu Pedro y su sucesornan tin e yabinan di Reino, cu ta e Iglesia di Hesus, cu ta e unico caminda y porta pa por drenta den e Reino di Dios. Hesus ta duna Pedro y su sucesornan e autoridad, di loke ta permiti y di loke ta prohibi den Iglesia. Ora cu Hesus a bisa Pedro, cu forsanan di fierno lo no podera di Su Iglesia, Esaki ta e diabelnan den fierno cu lo persigi e Iglesia di Hesus y nan lo lanta diferente sectanan y religionnan falso, pa desvia hendenan for di Iglesia pa nan perdicion. Na anja 1521, un tal Martin Luthero un frere teologo aleman, a bin cu e theoria di interpretacionnan liber di Bijbel. E interpretacionnan liber di Bijbel aki, a trece hopi divisionnan na mundo y a produci 36.000 diferente sectanan y nan a lanta nan mes un religionnan, sectanan y predicando e Bijbel den nan mesun manera. Pedro y su sucesornan tin e yabinan di Reino di Cielo, pero e sectanan nan no tin e yabinan di Reino di Cielo y nan no tin e salbacion. Den Bijbel Lucas 13: 25-30 Hesus ta bisa, cu lo bini hendenan di Oriente y di West, di Noord y di Zuid pa tuma parti den e Reino di Dios. Esaki ta e hendenan di henter mundo den e Aliansa Nobo di Dios Tata y cu a bautisa den e Iglesia Universal di Cristo-Hesus. Ora Hesus a bisa, cu porta di Reino lo sera pa bosonan y bosonan lo keda pafor, eynan lo tin yoramento y mordemento di diente. Esey ta esnan na mundo, cu no a acepta e Aliansa Nobo di Dios Tata y cu no a bautisa den e unico Iglesia Universal di Cristo-Hesus. Den Bijbel Mateo 16: 15-16, Hesus ta bisa Su Apostelnan: “Pasa rond di mundo y predica e Bon Noticia pa henter humanidad. Esnan cu kere y ta bautisa lo ta salba, ma esnan cu no ta kere, nan lo ta condena,” E palabra pasa rond di mundo y predica e Bon Noticia pa henter humanidad ta significa, Universal, Hesus Su Iglesia ta Universal. Universal ta Catolico. Compronde bon, ora cu Hesus a manda Su Apostelnan pa predica y pa bautisa, e Iglesia Universal di Hesus a cuminsa crece pa henter mundo. Hesus a institui Su 7 doctrinan di Gracia di Salbacion pa Su Iglesia. Bautismo Mateo 28: 19-20, Confirmacion Echonan di Apostelnan 2: 1-4, Confesion Huan 20: 23, Eucaristia Lucas 22: 19-29, Matrimonio Mateo 19: 4-6, Sacerdote Marco 3: 13-19, Enfermonan Hacobo 5: 14-15. Hesus ta bisa bon cla Bijbel Marco 16: 15-16: “Esnan cu no ta kere y cu no ta bautisa, nan lo ta condena.” Pesey, no tin salbacion pafor di Iglesia Universal di Cristo-Hesus. E Iglesia Universal di Cristo-Hesus, tin mas cu 2000 anja. Corda bon loke cu Hesus a bisa, cu e podernan di diabel lo no podera y lo no kibra Mi unico Iglesia. Pesey nunca no ta laat pa busca e berdad, prome cu Dios yama bo pa duna cuenta.
