Dios Tata ta manda Su Yiu Hesus na mundo, pa sera un Aliansa Nobo pa e Pueblo di Israel y pa mundo henter. E Aliansa Nobo aki, ta e un solo Iglesia di salbacion pa mundo henter. Bijbel Mateo 26: 26 – 28, den e ultima cena Hesus a bisa Su apostelnan: “Boso tur bebe for di e copa di binja aki, esaki ta Mi Sanger, e Sanger cu ta confirma e Aliansa cu Mi ta derama pa hopi hende, pa pordon di pikanan.” Akinan Hesus ta confirma Su Sacrificio y morto na crus, deramando Su Sanger precioso, pa e Aliansa Nobo di Dios Tata, cu ta e pueblo Nobo di Israel. Bijbel Mateo 16: 15 – 19: “Hesus a puntra Su apostelnan: Anto boso mes, ta ken boso ta bisa Mi ta? Simon a contesta: Bo ta E Mesias, E Yiu di Dios bibo! Hesus a bis’e: Felis bo ta Simon yiu di Huan, pasobra no ta hende a revela bo esaki, ma Mi Tata cu ta den Cielo. Mi ta bisa bo: Abo ta Pedro (o sea baranca) y riba es baranca aki, lo Mi lanta Mi Iglesia y forsanan di fierno lo no podera di dj’e. Lo Mi duna bo e yabinan di Reino di Cielo y loke bo prohibi na tera, ta prohibi den Cielo tambe y loke bo permiti na tera, lo ta permiti den Cielo tambe.” Akinan Hesus ta bisa bon cla, Mi Iglesia, osea un solo Iglesia y no Iglesianan. E forsanan di fierno, ta e demonionan den fierno cu lo lanta diferente sectanan, religionnan y iglesianan falso na mundo, pa podera y pa kibra e Iglesia di Hesus, pero nan lo no logra. Hesus a duna Simon e nomber Pedro, cu ta significa baranca, cabes visibel di Su Iglesia. Hesus a duna Pedro e yabinan di Reino di Cielo y esaki ta significa cu e Iglesia di Cristo-Hesus ta e unico porta pa laga e almanan drenta den Reino di Cielo. Den e unico Iglesia di Cristo-Hesus, tin e yabinan di e portanan di Reino di Cielo pa laga e almanan drenta. Hesus a duna e autoridad na Pedro pa dirigi Su Iglesia, di loke ta permiti y di loke ta prohibi. Bijbel Marco 16: 15 – 16, aki Hesus ta bisa Su apostelnan: “Sali pasa na henter mundo y predica e Evangelio pa henter humanidad.” E palabra, sali pasa na henter mundo y predica e Evangelio pa henter humanidad, ta significa, Universal, Hesus Su Iglesia ta Universal. E Iglesia Universal di Hesus, ta e Aliansa Nobo di Israel di Dios Tata. Awor, tur hendenan na mundo sea paganonan, sectanan y e Hudiunan mes, nan mester kere den Cristo-Hesus y nan mester drenta y bautisa den E Unico Iglesia Universal di Hesus, pa nan por drenta den e Reino di Cielo. Awor, ta di con tin tanto sectanan, religionnan y iglesianan falso na mundo y mientras ta un solo Iglesia Hesus a lanta? Na anja 1521, Martin Luthero un frere, teologo aleman a bai contra di e Iglesia Universal di Cristo-Hesus. El a inventa e theoria di e interpretacion liber di Bijbel. E interpretacion liber y e doctrinanan falso, a produci 36.000 diferente sectanan y religionnan na mundo. Tur e sectanan aki, ta pretende di ta di Hesus. Durante tempo nan a trece hopi divisionnan y hopi di nan a lanta nan mesun religionnan, iglesianan falso y sectanan y nan ta predicando e Bijbel den nan mesun manera y nan ta buscando hendenan debil den fe pa sigi nan. Martin Luthero a bira Protestant, pasobra el a protesta contra e Papa di Iglesia Universal di Cristo Hesus. Ta manera cu Hesus a bisa den Bijbel Mateo 16: 18, cu forsanan di fierno lo purba podera y kibra e Unico Iglesia Universal di Hesus, pero nan lo no logra. Pesey tur e religionan, tur e sectanan y tur e iglesianan falso na mundo, nan a wordo lanta door di e forsanan di fierno y e diabelnan a usa Martun Luthero pa desvia hopi hendenan na mundo for di e Unico Iglesia Universal di Cristo-Hesus. Hesus ta bisa bon cla den Bijbel Marco 16: 15-16: “ Esun cu no ta kere y no ta bautisa, nan lo ta condena.” E Unico Iglesia Universal aki di Cristo-Hesus, tin mas cu 2000 anja y a wordo lanta pa medio di e 12 Apostelnan di Cristo-Hesus. Nan ta e prome Obisponan y San Pedro ta e Prome Papa, cu ta e prome cabes visibel di Cristo-Hesus Su Iglesia aki na mundo. E palabra Universal ta significa, Catolica. Compronde bon, ta un solo Iglesia so tin pa drenta den e Gloria di Dios Tata y Hesus a institui tambe Su 7 doctrinanan pa nos cumpli cu nan, cu ta e 7 Sacramentonan di Dios Spirito Santo.
Scirbi pa Seferino Tromp
