Algo grandi sosode den bida di un persona , ora e entrega su bida na Cristo Hesus.
Den 2 Corintionan 5:17 e palabra di Dios ta bisa: Pesey si un persona ta den Cristo criatura nobo,e cosnan bieuw a pasa,caba, ata tur cos a bira nobo.
Romanonan 10:9-10 ta bisa: Cu si bo confesa cu bo boca cu Hesus ta Senjor, e kere den bo curason cu Dios a lant’E for di mortonan lo bo ta salba, pasobra cu curason hende ta kere pa hanja husticia,y cu boca e ta contesta pa hanja salbacion.
Pesey ora esaki tuma lugar den bida di hende cual ta un cambio grandi y beneficioso, cu ta hiba bo na bida eterna, Bijbel ta splica cu bo curpa ta bira tempel di Dios, pasobra e Spirito di Dios ta biba den bo, bo no ta di bo mes mas , bo a wordo cumpra pa un preis, bo a wordo redimi for di maldad.
Pesey e palabra di Dios ta bisa den 1 Corintionan 6:18-20 bisando;
Huy for di inmoralidad. Tur otro pica cu un hende comete ta pafo di e curpa, ma hende inmoral ta peca contra su mes curpa.
Of boso no sa cu boso curpa ta e tempel di Spirito di Spirito Santo kende ta biba den boso, Kende boso tin di Dios. Cu boso no ta pertenece na boso mes. Pasobra boso a wordo cumpra pa un preis,Pesey glorifica Dios den boso curpa.
Y e ta bolbe recorda nos den 1 Corintionan 3: 16-17 bisando: Boso no sa cu boso ta tempel di Dios, y cu e Spirito di Dios ta biba den boso, Si un hende destrui e tempel di Dios, Dios lo destruie.Pasobra e tempel di Dios ta santo, y esey ta loke boso ta.
Ningun hende no ta bisti panja nechi y despues bay tira su curpa abao den lodo, ni tampoco un hende no ta bay bisti un trahe blanco y despues bay traha cu grease y cosnan cu ta mancha y danja su panja.
Mescos tambe un hende mester realisa cu e Spirito Santo ta biba den dje, y e no por participa mas den e bida bieu cu e tabatin.
Mira e balor cu Senjor ta duna na nos , ora nos entrega nos bida na Cristo Hesus, y laga Cristo tin e berdadero prome lugar den nos bida, pasobra e Spirito di Dios ta bin biba den nos, y nos tur sa cu caminda e Spirito di Dios ta, ningun otro spirito impuro no por biba, pasobra e Spirito di Dios ta santo.
Ta pesey cualquier persona , cu entrega su bida na Cristo Hesus, no por puntra si e por participa den Halloween,Carnaval y sigi droga y usa alcohol pasobra, e sa awor cu e tin e Spirito di Dios ta biba den dje.
Pasobra biba pa Dios y participa den cosnan inmoral for di boluntad di Dios, ta nifica cu nos ta infiel na Dios. Tuma ehempel aki , bo ta casa, y bo casa ta bay drumi na cas di otro homber of otro muher y despues e ta lanta y bini cas serca bo, con lo bo sinti bo?
Awel pakico hende tin cu trata Dios asina? Sabiendo cu bo curpa ta tempel di Dios. Esey ta nifica cu no ta e edificio cu bo ta congrega den dje, pero curpa di nos cada un cu ta kere den Cristo ta Tempel di Dios, paden y pafor.
Ta bo curpa completo, y no bo curason so, ta tempo pa bira conciente.
Sinceramente, Pastor Marcel Balootje
