Welcome back! Mi nomber ta Dasha, mi ta un boticario na Botica di Servicio y mi tey atrobe cu un otro column.
Mi ta ripara hopi hende birando malo e dianan aki (y ami mes tambe, ugh). Tin hopi virus rond y un di esunan mas comun pero tambe peligroso ta e tan famoso “griep”, den otro palabra Influenza. Pero kiko esaki ta? Y dicon tur aña tin un otro variante di e vacuna contra esaki?
Influenza, of “griep” manera nos ta yame, ta un virus respiratorio cu ta bin bek cada aña. Aunke hopi hende ta pensa cu e ta simplemente un verkoud (y tin biaha e ta!), influenza por bira hopi mas serio — y den algun caso, hasta mortal!
E virus ta propaga facilmente: un nister, un tosa, of un man sushi riba un mesa y e virus por pasa di hende pa hende. Influenza ta ataca nos sistema respiratorio y por causa sintomanan manera temperatura halto, dolor di curpa, cansancio, tosamento y un sintimento general di “no ta bon”.
Pa mayoria hende saludabel, e “griep” ta pasa den un paar di dia te un siman. Pero pa muchanan chikito, adultonan mayor, personan cu problema cu nan sistema di inmunidad of cu malesanan cronico, influenza por trese complicacionan serio, manera pulmonia, hospitalisacion, y den e pio casonan: morto.
Un di e cosnan mas frustrante di e virus aki ta su capacidad pa cambia. Influenza ta cambia su mes constantemente, cambia su “outfit” manera un actor cu no kier wordo reconoci. Pa motibo di esaki, e vacuna contra influenza mester wordo actualisa cada aña. Cada temporada, expertonan ta studia cua tipo di e virus aki lo ta mas comun y basa riba esey nan ta desaroya e vacuna pa e aña aki. Pesey ta importante pa tuma e vacuna tur aña tambe si bo tin e riesgo di bira seriamente malo di e influenza!
E vacuna no ta duna 100% proteccion, pero e ta duna bo e miho posicion pa defende bo curpa. Si bo ta tuma e vacuna y bo ta haya e griep toch, e sintomanan ta generalmente mas suave. Mas importante: si e mayoria di hende vacuna, nos ta yuda proteha esnan cu no por tuma e vacuna nan mes, manera muchanan chikito of personanan cu tin alergia na e componentenan di e vacuna.
Akinan na Aruba e vacuna di influenza ta disponibel na Directie Volksgezondheid (DVG). Esaki ta gratis pa tur personanan di edad riba 60 aña y personanan bou di 60 aña cu ta sufri di malesa cronico (cu receta di dokter di cas). Pa publico general por haya e vacuna aki pa solamente 20 florin na DVG. Pa mas informacion por tuma contacto cu DVG: https://dvg.aw/pa/entrante-26-di-september-2024-vacuna-di-influenza-ta-disponibel-pa-tur-60-gratis/
Influenza no ta selectivo — e por afecta cualkier hende, sin importa edad of estilo di bida. Pero cu prevencion simpel, manera bon hygiene, keda cas mas posibel si bo ta sinti bo malo y tuma bo vacuna, nos por preveni hopi daño.
Influenza ta bin bek cada aña, pero cu nos curpa prepara y nos communidad bon proteha, nos por enfrente mas fuerte cu prome!
