Nos ta yama pa stima otro, pa yuda otro, pa encurasha otro, pa bendiciona otro, pa coregi otro, asina cu nos ta haci cu otro locual no ta boluntad di Dios, nos ta haci pica.
Tene cuenta cu haci mento di redo, persigi, papia malo di otro, sembra radia y discordia, trece division tur caminda, separa famia for di otro, trece violencia, tur esaki ta contra e palabra di Dios.
Nos mester wak masha bon pa no asocia cu hende cu ta causa division, pasobra tin biaha e palabra nan di hende ta mustra masha bunita, pero tras di e palabra tin hopi mal pensamento.
Tin hende no ta at all contento cu crecemento di nan prohimo, pesey nos mester sinja nos yuinan for di chiki, pa no envidia, no papia malo, no kibra otro, y esey ta cuminsa for di den cas, esey tambe ta parti di educacion.
Ora mi ta kibra mi propio ruman of famia, of amigo, mi ta demostra bobedad, pasobra pa mi haci malo, mi curason mester ta yena cu maldad, pasobra locual hende ta papia y desea ta locual nan curason ta yena di dje.
No tin nada mas tristo ora tin division den un cas, ora unidad no ta presente, ora hende no ta papia cu otro, y dia pa dia e cos ey ta aumenta, y si nos lesa 2 Timoteo 3:1-5 nos ta compronde ta dicon.
Pero mescos cu nos sa, cu mal tempo ta biniendo nos ta segura nos cas cu plywood, haci cura limpi, kita tur cos cu biento por hisa pone un banda, asina tambe nos mester cubri nos bida cu e Sanger di Cristo, y cu oracion ferviente pa asina nos por para firme den e tempo trabahoso aki.
Galationan 5:13 y 5;15 ta para scirbi:Pasobra boso a wordo yama pa libertad,rumannan, solamente no usa boso libertad como un oportunidad pa e carni, ma laga un sirbi otro pa medio di amor.
Ma si boso ta morde y devora otro,mira pa boso no wordo destrui un door di otro.
Ora relacion di mayor den un hogar no ta bon, henter e famia por wordo contamina, cu stress, rabia amargura, pasobra esnan yama pa Dios pa pone ordo, nan mes no ta den union cu otro.
Hopi biaha falta ta wordo tira riba e hoben of e mucha cu ta rebelde, pero hopi di nos , no sa kico ta pasando den cas, y kico e mucha ey ta mira tur dia, cu ta cambia su comportacion, y ta sembra falta di respet den su actitud.
Den tur locual cu nos ta haci laga amor prevalece, pasobra amor ta bini di Dios, y amor ta cura herida, amor ta preserva e vinculo di pas, amor ta pone hende stima otro y stima Dios, amor ta corre cu maldad , envidia y imoralidad.
Mescos cu awa den cara ta refleha cara, asina curason di hende ta refleha hende. ( Proverbionan 27:17).
Un mucha ta wordo reconoce na e educacion cu e hanja na su cas, esey ta un berdad cu ningun hende por sconde locual a wordo sembra den dje, esey lo ta e cosecha cu nos lo ricibi segun e ta bira grandi.
Conserva boso mes den e amor di Dios,sperando cu gran antisipacion e misericordia di nos Senjor Hesus Cristo pa bida eterno.( Judas 1:21).
Stima otro, haci bon pa otro, no paga malo cu malo, no sembra odio, no sembra maldad,no haci cu otro locual bo no kier pa nan haci cu bo.
Laga amor identifica bo bida, laga e pas di Cristo goberna.
Sinceramente, Pastor Marcel Balootje
