Aruba perde un gran patriota
Informacion cu a yega na nos mesa di redaccion ta indica cu señor Bobby De Kort a fayece awe madruga, mas o menos rond di 2’or pa 3’or di madruga, despues cu a sufri un situacion medico repentino na aeropuerto mientras e tabata sinta den sala di espera, pa subi avion.
Mesora a yama ambulance y a transporte pa hospital, unda el’a ricibi atencion medico. Desafortunadamente, a bin confirma cu e no a logra supera e situacion critico y a fayece.
Bobby De Kort ta conoci pa su gran amor pa Aruba. Un persona nacionalista cu un gran trayecto den varios sector, y despues a biba un tempo na Hulanda, unda el’a forma su hogar hunto cu su señora, cu tabata constantemente na su banda.
Na Aruba, hopi hende lo por recorda Bobby tambe pa su trabao di bende pisca, ora e yega na cas di hende of para na banda di caminda pa bende su piscanan fresco.
Pero aparte di esey, Bobby De Kort tabata un voz conoci den opinion publico: e tabata duna su opinion riba e desaroyonan cu ta tuma luga den nos pais. Como fiel oyente di 95.1 Top FM, e tabata sigui programa di mainta y merdia cu gran interes.
Nos ta manda nos profundo condolencia na su señora, su famia y tur esnan cu conoci of stima di Bobby.
Cu su alma por haña pas y descanso eterno.
