But di FTAC na Ernst & Young imponé korektamente
Awe, Korte di Promé Instansha a dikta sentensia den un disputa atministrativo entre Ernst &
Young i Fair Trade Authority Curaçao (FTAC). FTAC a imponé un but di NAf 400.000,- na
Ernst & Young pa no a reportá na FTAC un asina yamá konsentrashon. Resumí kòrtiku, e
término konsentrashon den e kaso aki ta referí na obtenshon di influensia dor di Ernst & Young
tokante un of mas empresanan òf partinan di KPMG.
KPMG
Na final di 2018, medionan di komunikashon di Kòrsou a publiká tokante un fushon entre
KPMG Dutch Caribbean (KPMG) i Ernst & Young Dutch Caribbean (Ernst & Young). Ambos
empresa ta aktornan importante den e sektor di ouditor (accounting). No opstante, entrante 31
di desèmber 2018, KPMG International a revoká e lisensia di KPMG, ku ta nifiká ku KPMG no
por a usa e nòmber KPMG mas.
Investigashon
A base di e notisianan aki FTAC a inisiá un investigashon, pasobra Ernst & Young no a reportá
nada tokante di un konsentrashon ku KPMG, ni tampoko despues ku FTAC a hasi pregunta
tokante esaki. Lèi (Landsverordening inzake concurrentie) ta obligá ku mester reportá un
konsentrashon na FTAC prome ku krea esaki.
Den kuadro di e investigashon, FTAC a tene entrevista ku diferente kompetidornan,
direktornan i klientenan, entre otro. Segun FTAC, for di e investigashon ta resultá ku pa motibu
ku un konsentrashon a ser establesé, Ernst & Young mester a raportá esaki na FTAC.
Sentensia di Korte
Korte a huzga ku a kumpli ku e kondishonnan ku ta apliká pa raportá un konsentrashon. Pues
Ernst & Young mester a raportá e konsentrashon na FTAC. Pa e huisio aki, Korte a konektá ku
desishonnan tokante e tópiko aki di Korte di Hustisia di Unión Oropeo. Den e sentido aki, Korte
a konsiderá di importansha ku Ernst & Young a traha plan konkreto pa tuma ofer klientenan di
KPMG i a sera akuerdonan ku èks direktornan di KPMG. Den e marko ei, tambe a palabrá ku
Ernst & Young lo haña akseso na tur informashon relevante pa por ehekutá e plannan di
transishon ku a ser trahá. Tokante algun kliente a akordá ku nan lo keda ku Ernst & Young.
Además, a akordá ku èks direktornan di KPMG no por a drenta den akuerdonan nobo ku
klientenan eksistente òf nobo sin pèrmit di Ernst & Young. Pa finalisá, ta importante ku en todo
kaso 14 empleado di èks KPMG a drenta den servisio di Ernst & Young den e periodo di promé
di februari te ku 15 di februari 2019. Seguidamente, Korte a huzga ku a kumpli ku e kondishon
ku e empresanan involukrá a krea un kuota di merkado di 30% òf mas ku e konsentrashon.
But
E but a ser imponé na tres kompania. Ningun di e kompanianan – ku tur ta forma parti di e
unidat ekonómiko Ernst & Young Dutch Caribbean – a reportá e konsentrashon. Pa e motibu
aki, FTAC por a imponé e but na e tres kompanianan.
Por lesa e desishon aki riba www.rechtspraak.nl bou di e number: ECLI:NL:OGEAC:2023:205.
