Diabierna atardi a tuma luga na Impact Hub Aruba e prome edicion di ‘Caribbean Journalism Seminar 2024’ cu a sirbi di escenario pa e lansamento di e prome asociacion di periodista profesional di Aruba ‘Red Arubiano di Prensa Profesional (RAPP)’ y a conta cu e presencia di un invitado internacional specialisa den periodismo investigativo.
Durante e seminario a conta cu un sala yen di periodistanan y invitadonan interesa a haya sa un poco mas di e temanan presenta durante prome evento di Red Arubiano di Prensa Profesional (RAPP) cu tabatin e participacion di invitadonan special manera:
Luis Anibal Villegas: Ken a eherce como periodista na Aruba y na e momentonan aki ta traha como ‘freelance’ y ta studiante di Ley na UVA na Hulanda. Villegas a presenta “Lob-generator” un herment pa habitantenan di e islanan di Reino Hulandes por solicita informacion publico mas facil.
Marlon Kock: Experto den UX a elabora riba “Inteligencia Artificial y con e periodistanan por uz’e manera un ‘timemachine cu ta yuda den e produccion’.
Carla Minet (Orador principal): Ta un periodista investigativo cu a participa den investigacionnan importante manera Panama, Pandora y Paradise Papers. E ta fungi como director ehecutivo di Centro Investigativo de Periodismo na Puerto Rico y a presenta e tema “Retonan y Oportunidadnan pa periodistanan den Caribe”.
Akinan Minet a splica e escenario actual na diferente pais den Caribe y e retonan cu periodistanan ta topa. “Ta urgente pa periodistanan investigativo den e region cuminsa traha hunto riba storianan pa asina e pubico ta miho informa di e problemanan cu ta afecta nan y asina tene e forzanan na mando responsabel. Tambe ta importante pa traha hunto den e region pa asina por yuda otro, mirando e scarsedad di apoyo cu periodistanan tin, specialmente den cubri temanan dicifil na unda no tin recursonan suficiente y cu ta imposibel pa eherce e trabao sin cu hende conoce bo of por haya un otro trabao”, e ta splica.
Red Arubiano di Prensa Profesional (RAPP) ta un organisacion sin fin lucrativo cu ta dedica na stimula e practica liber di periodismo y normanan di comportacion etico.
RAPP ta traha pa inspira y educa e periodistanan actual y futuro periodistanan pa medio di desaroyo profesional y ta proteha e garantianan fundamental di libertad di expresion y libertad di prensa pa medio di su esfuersonan di defensa.
E organisacion a establece su mes oficialmente como un asociacion, siguiendo e guianan etico di Asociacion di Periodista Hulandes (NVJ).
For di januari, e fundadornan di RAPP Melissa Stamper, Andreina Morillo y Yorleny Oduber a bin cu e idea di crea un colectivo pa asina profesionalisa prensa na Aruba cu ta hopi necesario. Nan a reuni frecuentemente pa asina yega na un vision conhunto y asina a nace RAPP cu e obhetivo di trata e desafionan actual den e sector di prensa na Aruba.
E fundacion di e organisacion ta refleha un compromiso pa promove excelencia periodistico, preparando e caminda pa un ambiente profesional cu mas cohesion y mas inclusivo.
RAPP kier gradici na sponsornan cu a haci e seminario aki bira un realidad: Vertegenwoordiging van Nederland in Oranjestad (VNO), Aruba Bank, AHATA, Setar, Aruba Airport Authority NV, Oficina di Turismo (ATA), Free Press Unlimited, UNESCO, Impact Hub Aruba, Hyatt Place Airport, Old Cunucu House, como tambe otro sponsornan cu a duna nan valioso aporte.
E periodistanan cu kier afilia nan mes of kier mas informacion por tuma contacto na e siguiente e-mail: rapp.aruba@gmail.com
