Recien mi tabata testigo di tres di e varios encuentronan cu señora Lissette van Trigt a tene na grup’i bishitante cu interes den su praatgroep presenta. E lugar tabata MFA Paradera, pero tambe ta uza MFA Noord y Savaneta. E temanan tabata eo. duna y ricibi compliment, me time y biba den presente.
E praatgroep a nace algun tempo pasa ora cu Lissette, cu ta un trahado social cu mas cu 25 aña di experiencia na Hulanda, a nota cu aki na Aruba tin e necesidad pa hendenan por reuni cu otro y intercambia idea y pensamentonan. Cada persona por siña di otro y por tambe conseha otro pa haci nos mundo miho.
E encuentronan tin un ambiente positivo y e gruponan a bay cas contento. Durante e encuentro di Easter, Lissette y su esposo Sandy, den forma creativo, a trece frase- y preguntanan cu tabata duna e grupo chens pa pensa y haya mas aprecio pa e bida cu nan tin. Tambe cada participante a ricibi na final un regalo pa hiba cas.
Na nomber di e grupo mi ta gradici Lissette y esposo pa e entusiasmo cu nan tin y e forma unico di organisa y presenta e praatgroep. Keda pendiente p’e siguiente praatgroep. Pa mas informacion por manda Lissette un mensahe na 5611774.
