Dialuna anochi, serie pa campeon di Liga Americana a continua den Fenway Park na Boston caminda ekipo di cas Boston Red Sox a ricibi ekipo di Houston Astros.
Serie te na e momento ey tabata empata 1-1 y dialuna a tuma lugar wega number 3, pa ekipo di Boston Red Sox a inicia cu Eduardo Rodriguez como pitcher habridor mientras cu Houston Astros tabata tin Jose Urquidy como nan pitcher habridor.
Den e wega aki, ofensiva di Boston Red Sox a traha for di dos inning caba anotando un total di 6 careda, poniendo e wega den un posicion dificil pa Houston Astros.
Den bom di tres inning Boston Red Sox ta amplia score y ta haci e wega 9-0, Houston Astros den cabez di 4 inning, ta anota 3 careda y esey tabata tur pa Houston Astros tambe den e wega aki, Boston Red Sox a bay cu e victoria cu score final di 12-3.
Boston Red Sox a score 12 careda, a bati 11 hit y no a comete error, pitcher ganador a resulta Eduardo Rodriguez, mihor bateadornan pa Boston Red Sox a resulta Hunter Renfroe cu a bay di 2-2 y J.D. Martinez cu a bay di 3-2.
Houston Astros a score 3 careda, a bati 5 hit y a comete 2 error, pitcher perdedor a resulta Jose Urquidy, mihor bateador pa Houston Astros a resulta Yuli Gurriel cu a bay di 3-2.
Den wega di National League, Atlanta Braves ta ariba den serie 2-0 contra ekipo di Los Angeles Dodgers cual serie ta bay tuma lugar awor 3 wega na Los Angeles.
