Botica di Servicio ta orguyosamente anuncia cu tur nan boticanan – Botica Eagle, Botica Noord, Botica Maria y Botica Seroe Preto – a ricibi certificacion oficial segun e estandares di HKZ (Harmonisatie Kwaliteitsbeoordeling in de Zorgsector). E logro aki ta demostra e compromiso di cada botica pa mantene e nivel mas halto di calidad y seguridad den cuido di salud, reforzando nan dedicacion na excelencia den industria farmaceutico di Aruba.
Ricibi e certificacion HKZ segun estandares di ISO 9001 ta un gran logro pa cada botica, demostrando cu nan ta duna atencion di cuido na e pashent, mantene procedimiento interno fuerte y ta entrega un servicio confiabel y di calidad halto constantemente. E proceso di certificacion, completa cu e apoyo di nos socoi Hulandes, Service Apotheek, a wordo valida pa Lloyd, un cuerpo di certificacion internacional. E reconociemento aki ta sigura adicionalmente cu cada botica certifica ta cumpli cu e rekerimento di calidad, cu lo wordo mantene y evalua anualmente via audit.
E certificacion historico aki ta posiciona Botica Eagle, Botica Noord, Botica Maria y Botica Seroe Preto como lider den Caribe, cu Botica di Servicio Eagle siendo e prome botica den e region cu a obtene e certificacion, y awor e otro boticanan a sigui. E team completo ta honra cu nan a logra esaki, marcando un paso significante pa avansa e estandares di cuido di salud y pa apoya e desarroyo profesional di farmaceutico den e isla.
Un Era Nobo den Entrenamento y Desarroyo Farmaceutico
Cu e certificacion aki, Botica di Servicio ta certifica pa sirbi como sitio di entrenamento pa e specializacion di farmaceutico publico. E desaroyo aki ta un primisia pa e region Caribeño, cual ta permiti futuro farmaceuticonan pa completa nan entrenamento specialisa localmente. Adrienne Tromp, un farmaceutico dedica cu a bolbe pa Aruba cu un pasion pa mehora e cuido di salud local, ta un di e promenan pa beneficia di e iniciativa aki, kende a caba su estudio recien.
Farmaceutico publico Anoeska Wever, cu a ricibi entrenamento na Hulanda, ta parti di e team na Botica Eagle y lo contribui na entrenamento di futuro farmaceuticonan den e specializacion aki, remarcando e compromiso di Botica na cuido di calidad y crecemento di profesionalnan farmaceutico na Aruba.
Cu e logro aki, Botica di Servicio ta tuma un paso importa pa sigura un servicio farmaceutico mas sigur y di calidad halto na Aruba. E certificacionan aki ta crea oportunidadnan nobo pa specializacion den botica y ta contribui pa establece Aruba como un centro di excelencia farmaceutico y pa duna boticanan local e oportunidad pa sigui entrenamento avansa den nan comunidad mes.
