Diabierna mainta 28 di juni, Prome Minister Evelyn Wever-Croes hunto cu Conseho di Minister a bin hunto na La Cabana Beach Resort bou di invitacion di Minister di Naturalesa, Ursell Arends pa dialoga riba e Cambio Climatico y su efectonan pa Aruba. Presente tambe tawata algun director di Departamentonan di Gobierno.
Durante e reunion aki, Prome Minister a duna di conoce cu e Cambio Climatico ta algo cu ta afecta Aruba pa basta tempo caba. Mundo henter ta papia di e efectonan di Cambio Climatico pero na Aruba no ta solamente papia di dj’e pero ya ta mira y sinti e efectonan. Pa e motibo aki e ministernan a reuni bou invitacion di Minister di Naturalesa, Ursell Arends pa papia cu e comision nacional (NCRC) cu ta atende cu esaki pa Aruba.
E mainta aki Conseho Nacional di Resilencia Climatico of National Climate Resilience Council (NCRC), y e expertonan di exterior a debati riba cada punto di importancia di e Cambio Climatico pa Aruba. Ta un echo cu Aruba su clima ta cambiando. Por sinti cu ta mas calor, ta keda largo sin yobe y ora awa yobe e ta yobe duro ocasionando dañonan na nos infrastructura y na propiedad di nos ciudadanonan.
Un echo pa pone bon atencion na dj’e tambe ta cu e nivel di lama ta subiendo. Tin algun staca den lama cerca di e beachnan cu ya ta hopi leu di e beach caba indicando e incremento den e nivel di lama. Asina tin diferente señal cu Aruba ta sintiendo e efecto di e Cambio Climatico.
Prome Minister ta indica cu e echo principal ta e manera pa atende cu e fenomeno aki. Mundialmente a dicidi cu mester adapta plannan di energia, transiciona na energia limpi, pa evita cu e impacto di e Cambio Climatico ta bira aun mas fuerte. Aruba ya ta trahando y lo cumpli cu esaki, pero ta depende tambe di paisnan grandi cu hustamente ta esunnan cu mas efecto tin riba e planeta. Como sea, Aruba mester ta prepara pa e impacto y esey ta cu e plannan di adaptacion di clima, (climate adaptation) y e mitigacion (climate mitigation).
“Mi ta gradici Minister Ursell Arends cu a tuma e iniciativa aki. A lanta e comision aki den Conseho di Minister y tin dos aña trahando riba dj’e. Mi ta gradici tambe esnan di Simpson Institute cu ta trahando riba un risk assessment cu yama CORVI (Climate and Ocean Risk Vulnerability Index) y asina yuda nos trece na lus di dia e riesgonan pa Aruba. E Cambio Climatico ta algo cu nos tur mester ta prepara p’e y tambe mester traha riba conscientisacion pa cada ciudadano di nos pais compronde kico esaki ta, kico lo bira e efectonan di esaki na Aruba y rond mundo. E importante ta pa Aruba ta bon prepara pa esaki y esey Gobierno ta trahando duro riba dj’e”, Prome Minister a remarca.
