Vondellaan – Diamars mainta trempan den careda di 8’or y mey por a mira guardianan di C.E.A yega y despues e transportwagen mes.
Pues vigilancia y siguridad ta keda vigente.
Dos sospechoso a wordo treci.
Prome cu baha tawata Franklin Abath y e segundo cu a baha di e mesun transportwagen tawata Freddy Every. Ambos den boei segun e protocolnan durante cu bo ta wordo transporta.
Preguntanan a cuminsa lanta, ta cuanto mas e personanan aki mester wordo interoga. Kizas nan no ta cooperando, esey ta pregunta.
Pues e diamars aki lo bira posiblemente un otro dia largo pa e dosnan aki, esey ta te unda nan dicidi di coopera cu e interogacion.
Un sospechoso tin e derecho di keda sin contesta preguntanan y of pruebanan treci contra di su persona.
Un caso hopi interesante den historia di Aruba, esta un caso di corupcion grandi.
Ministerio Publico: ” Desde 11 april ultimo Landsrecherche a haci un detencionnan den cuadro di e investigacion di delitonan di corupcion posiblemente cometi y otro hechonan castigable relaciona cu otorgamento di terenonan di gobierno entre 2009 y 2017. Cuatro sospechoso ta deteni ainda.
E expectativa ta cu e investigacion lo ta cla dentro di no mucho tempo y cu e proces-verbaal final lo wordo entrega na Ministerio Publico. Den e periodo venidero lo tin algun detencion mas”. Esaki ta un press release haya ariba april 30 2021.
