E di dos wega di dialuna pa round di 16 tabata entre 5 biaha campeon mundial, e gigantenan di Sur America Brazil cu a enfrenta South Korea.
Brazil a sali number uno den grupo G mientras cu South Korea a clasifica number 2 den grupo H.
Brazil den su ultimo wega di fase di grupo a hunga mayoria cu si hungadornan reserve y a perde conta di Cameroon, cu a pone hopi fanatico duda den seleccion di Brazil.
Pero den wega aki Brazil a conta cu su hungadornan estelar y e fiesta di futbol alegre a cuminsa for di trempan caminda Vinicious Jr ta pone Brazil ariba cu score di 1-0 apenas na di 7 minuut.
Na di 13 minuut defensa di South Korea ta comete un penalty y aki Neymar Jr ta anota e di dos gol pa Brazil.
Richarlison despues di varios toke di bala entre Raphinha, Neymar Jr ta anota e di tres gol pa Brazil y su di tres gol tambe den mundial pa haci e wega 3-0 na di 29 minuut.
Lucas Paqueta ta anota e di cuater gol pa Brazil den prome mitar pa haci e wega 4-0.
Sigur Brazil a demostra e futbol alegre den prome mitar y South Korea no tabata tin respuesta pa cu esaki.
Den di dos mitar Brazil a hunga hopi trankil, creando oposición pa anota gol, pero no a probecha di esaki nan.
South Korea ta anota e gol di salba honor na di 76 minuut pa medio di Paik.
Asina e wega aki a termina caminda Brazil ta avanza pa siguiente buelta y lo ta enfrentando Croatia den cuart final.
Brazil den ultimo mundial no a logra pasa e fase aki, mientras cu Croatia ta actual sub campeon di mundo.
Keda pendiente pa mas información di Copa Mundial Qatar 2022 den Solo di Pueblo.
