Cu 2 gol di Richarlison
Ultimo wega di diahuebs atardi (ora local) tabata entre e cinco biaha campeon mundial Brazil y Serbia.
Prome wega di e grupo aki tabata entre Switzerland y Cameroon aki Switzerland a gana cu score di 1-0.
Hopi bista tabata riba Brazil pa cu e wega aki ya cu 2 nomber grandi a sufri derota caba den mundial aki den nan prome wega.
Mester bisa cu den prome mitar ningun di dos ekipo tabata mustra comodo riba tereno.
Algun contra atake, pero sin resultado.
Prome mitar a bay den descanso cu score empata 0-0.
Den di dos mitar, Brazil tabata mustra e ekipo favorito pa bira campeon mundial tocando e bala, hungando futbol di toke.
Na di 62 minuut ariba contra atake, Vinicious Jr ta los un tiro violento cu keeper ta logra saca, pero ta cay riba pia di Richarlison cu ta pone Brazil ariba cu score di 1-0.
Brazil a keda pone presion y un biaha mas na di 73 minuut, Richarlison ta haya un pase y ta lanta e bala y cu un chalaca ta anota e gol mas bunita te na e momento aki di mundial pa haci e wega 2-0.
Despues di e gol aki Brazil a haci algun cambio y pa descansa su hungador nan.
Asina tambe e wega a termina cu score di 2-0 na fabor di Brazil.
Den proximo edicion di Solo di Pueblo lo haci un análisis di e prome weganan di Copa Mundial Qatar 2022
