Bucuti & Tara Beach Resort, e hotel mas eco-certifica den Caribe, a clausura un Earth Week 2026 significativo y inspirador. Durante e siman, Earth Day a transforma den un celebracion di varios dia, enfoca riba sostenibilidad, bienestar y accion comunitario.
Cu Earth Day, riba diaranson 22 di april, como punto central, e resort exclusivo pa adulto a invita huespednan y asociadonan pa bai mas aya di conscientisacion y participa activamente, experimentando di cerca con accionnan chikito pero intencional ta contribui na un planeta mas saludabel. E celebracion aki ta refleha un biaha mas e liderato di e trayectoria largo di Bucuti & Tara den turismo sostenibel. Como e prome y unico hotel certifica CarbonNeutral® den Caribe, e resort ta sigui integra responsabilidad ambiental den cada aspecto di e experiencia di huesped.
Earth Day den accion: limpieza di costa rond di henter e isla
E punto culminante di Earth Week a tuma luga riba Earth Day, 22 di april, ora Bucuti & Tara Beach Resort a participa den Aruba Hotel and Tourism Association (AHATA) su limpieza di costa rond di henter e isla. E iniciativa aki ta forma parti di un trayectoria di compromiso ambiental di a resort cu e tin mas di 30 aña haciendo tur luna.
Proteha e ecosystema fragil di Aruba ta un responsabilidad comparti di nos tur. E limpiesa di costa organisa door di AHATA ta un reflexion poderoso di e berdad ey, uniendo hotelnan, negoshinan, scolnan y miembronan di comunidad den un esfuerso colectivo cu ningun organisacion riba su mes por logra. Ora e comunidad di hospitalidad di Aruba ta para hunto, e impacto ta yega muchu mas leu cu e costa, fortaleciendo un cultura di cuido cu ta proteha nos isla pa futuro generacion.
Na cuminsamento di e añanan 1990, propietario Ewald Biemans a funda e Comite Ambiental di AHATA y a lansa e programa “Sponsor-a-Mile,” inspirando e comunidad di hospitalidad di Aruba pa uni den proteccion di e costanan di nos isla. Desde e tempo ey, Bucuti & Tara a sigui fortalece e compromiso aki cu limpiezanan di costa cada di tres diaranson di luna, invitando huespednan, asociadonan y comunidad local pa contribui activamente na mantencion di e costa. Awe, e impacto duradero aki ta continua bou di liderato di Managing Director Cresi Biemans.
Riba e parti di Eagle Beach cu Bucuti & Tara ta cuida, 104 participante a reuni den un esfuerso comparti pa proteha e costa di Aruba. Entre nan tabatin asociadonan di e resort, boluntarionan di JetBlue Aruba, studiantenan di 5de klas di Scol Basico Mon Plaisir y nan juffrouwnan y huespednan aprecia.
Hunto, e grupo a colecta 12 saco di desperdicio, dos container grandi y aproximadamente 50 kg di materialnan grandi. Di e total, e studiantenan a colecta 45.48 kg (un aplauso grandi), mientras asociadonan di Bucuti y boluntarionan a colecta 38.36 kg.
E iniciativa no solamente a retira materialnan descarta for di e costa, sino tambe a fortalece conscientisacion ambiental entre diferente generacionnan demostrando e impacto positivo cu accion comunitario por tin.
Accion ambiental mas aya di costa : limpieza na The Bucuti Tara – GMC Nature Preserve
E esfuersonan di Earth Week tambe a extende na The Bucuti Tara – GMC Nature Preserve, un area proteha di 32 hectar na Noord, dedica na restauracion, biodiversidad y futuro ambiental di Aruba.
E tereno, cu un tempo tabata den riesgo di desaroyo, a wordo preserva permanentemente door di e resort y transforma den un ecosistema bibo mediante esfuersonan continuo di restauracion natural. Awe, e reserva ta sostene flora nativo, fauna local y captura natural di carbono, sirbiendo como un ehempel fuerte di conservacion regenerativo riba e isla.
Durante Earth Week, huespednan, asociadonan y boluntarionan a uni pa apoya e mision aki di cerca, retirando materialnan descarta y contribuyendo na restauracion continuo di e reserva.
Na total, 12 participante a participa den e actividad, incluyendo 10 asociado di Bucuti y dos mayor cu a wordo inspira pa uni despues cu nan yiu muhe, un studiante di Colegio Arubano, a atende un presentacion di sostenibilidad di Bucuti & Tara. Hunto, nan a colecta mas di 150 kg di materialnan descarta, contribuyendo na proteccion y restauracion continuo di e espacio natural importante aki.
Mas cu un limpieza, e experiencia aki a reforsa e importancia di no solamente preserva e paisahenan di Aruba, sino tambe restaura nan activamente pa futuro generacionnan.
Un siman di conexion significativo y experiencianan consciente
Durante henter e siman, huespednan a participa den un serie cuidadosamente cura di experiencianan diseña pa profundisa nan conexion cu naturalesa, mientras nan a explora forma practico pa biba mas sostenibel.
- Un Sustainable Wine Tasting a presenta biñanan organico y cuidadosamente selecciona, destacando con cuido pa medio ambiente ta influencia tanto produccion como sabor.
- Un Zero-Waste Mocktail Class interactivo a demonstra forma simpel pero significativo pa reduci desperdicio di cuminda, usando ingredientenan di manera creativo y consciente.
- Un Cacao Ceremony cu ta promove ekilibrio a ofrece un momento di reflexion mediante mindfulness, sound healing y tradicionnan antiguo cu ta conecta bienestar personal cu e mundo natural.
- Un Movie Under the Stars cu Turning the Tide, un storia inspirador di Aruba tocante conservacion y cambio, a destaca e esfuerzonan profundo di Aruba Conservation Foundation y comunidad pa restaura e isla y e oceanonan rond di dje.
E experiencianan aki a subraya cu sostenibilidad no ta solamente un responsabilidad, sino tambe un manera inspirador di biba.
Un compromiso duradero
Aunke Earth Week ta sirbi como e celebracion principal di sostenibilidad di Bucuti & Tara, su mision ta bai mucho mas leu cu un solo siman. Cu mas di 400 iniciativa ambiental y social, e resort a mantene neutralidad di carbono desde 2018 y ta sigui establece standardnan pa hospitalidad sostenibel na nivel mundial.
For di eliminacion di plastico di un solo uso hopi decada pasa, te na desaroyo di programanan di conservacion y alianza cu comunidad, Bucuti & Tara ta sigui comprometi na proteccion di beyesa natural di Aruba pa futuro generacionnan.
Manera Earth Week 2026 a demonstra, un ambiente limpi y bon conserva no ta un luho; ta un responsabilidad comparti y un privilegio pa proteha hunto.
Pa mas informacion bishita bucuti.com/sustainability.
