SAN NICOLAS – después cu na april ultimo, Kiwanis Club of San Nicolas hunto cu directie di Filomena College Mavo a tene nan prome evento pa registración di miembronan; dialuna studiantenan di Filomena College Mavo a haya oportunidad pa elegi colega studiantenan cu lo forma parti di e directiva di e club menciona.
E idea pa bin cu e Builders Club di Kiwanis na Filomena College Mavo a cuminsa door di e deseo di Kiwanis Club of San Nicolas; un club relativamente hoben pa yuda inculca liderazgo, boluntarismo y cooperacion den nos hoben nan. Un punto di bista cu ta alinea cu e misión y visión di e directiva nobo, lidera door di Juf. Raquel Lampe y Jorainne Oduber.
“Nos studiantenan tin hopi potencial y nos kier crea conhuntamente cu otro partner nan, e plataforma pa nos studiantenan por mustra nan potencial”, ta locual cu Juf. Lampe a comenta den un di e prome reunión nan cu Kiwanis Club of San Nicolas.
Ja caba na April, e studiantenan a organisa un Food Drive y a reparti tur locual nan a recauda pa yuda 20 famia den necesidad cu cuminda pa mas o menos dos siman. E cahanan a wordo reparti na diferente scol den comunidad di p’ariba di brug. Cabesantenan cu a ricibi e donación nan aki, a keda masha agradeci na miembronan di Builders Club of Filomena College Mavo.
Dialuna, un total di 85 studiante, miembro di e club nobo aki tabata tin derecho di voto. E votación a tuma lugar den pauze cu un esfera hopi ameno y positivo.
Na final e resultado a keda como lo siguiente: Iriengelo Jamanika lo lidera e club pa e aña kiwanistico 2021-2022 como presidente, Jean Ferrin Castillo lo fungi como vicepresidente, Rudlene Boezem lo ta e secretaria, Sharily Boekhoudt como Tesorera, Mireya Weller como e Editor/PR y finalmente Iriengely Jamanika como e Service Projects.
Juf. Jorraine Oduber y Juf. Raquel Leocadia lo fungi como e docentenan cu lo conseha miembronan di e Builder’s Club y naturalmente miembronan di Kiwanis Club of San Nicolas cu tambe lo fungi como e conseheronan di parti e club.
Miembronan di Kiwanis Club of San Nicolas ta hopi orguyoso di por a brinda e oportunidad aki na nos hoben nan di Filomena College Mavo y ta sigur cu nan lo demonstra nan potencial máximo.
Manera e dicho ta bisa: “awo trabou tey cuminsa”.
