E ta un femomeno mundial, cu ta costando bida di hende, cherchamento no ta cos di awor, ta un cos cu a cuminsa hopi siglo pasa, pero cu awor a cohe dimension dramatico, pa mihor bisa diabolico.
Pa gosa cu dolor di otro hende ta facil, pa chercha hende ta facil, sin lubida cu cherchamento ta un abuso verbal, algo cu no ta wordo haci nunca pa bon.
Palabra di Dios y ta avisa lo siguiente: Bendiciona ta e hende cu no ta cana den conseho di malbadonan,ni ta para den caminda di pecadornan, ni ta sinta riba e stul di bofonadornan, ( Salmo 1:1.
Laga nos wak tur e bendicionnan cu ta sigi e persona aki su bida, con Dios ta habri portanan pe.
Palabra di Dios, ta pidi pa tene cuenta cu esaki:Esun cu haci bofon di e hende pober, ta insulta Esun cu a trah’e. Y esun cu gosa di mira calamidad lo no keda sin castigo.( Proverbionan 17:5).
Aki nan como mayor , nos tin un punto hopi serio pa rasona cu nos yuinan, pa nan evita di bully, chercha of haci bofon di otro hende, pasobra nos como hende grandi mester sa mihor.
Como hende grandi bon educa cu tin experiencia di bida, ningun hende ta spera cu nos tin curashi, di bully,chercha, of haci bofon di otro, pasobra nos sa di profundidad di nos curason cu esey no ta bon den bista di Dios.
Hoben ta wak riba comportacion di adulto, y for di esey e ta cohe experiencia, un yiu ta comporta su mes segun e experiencia di educacion cu e ricibi serca su mayornan, y esey mayornan mester tene bon cuenta cune, pasobra bo DNA ta persigi bo.
Plania locura ta pica, y e hacido di bofon ta un abominacion pa hende.( Proverbionan 24:9).
No gosa ora bo enemigo cay,y no laga bo curason ta contento ora e trompica, pa Senjor no mira esaki y keda malcontento, y E kita su rabia for di riba dje.( Proverbionan 24:17-18).
Nos tur ta bibando riba mundo y nos ta vulnerabel, ta e misericordia di Dios y e compasion di Dios tin nos wanta, ta Senjor ta cuida nos tur , asina ta cu nos mester yuda otro lanta, nos no tey pa kibra otro, pero pa encurasha otro, pa arepenti, confesa, y sigi pa dilanti, esey ta e boluntad di Dios pa nos bida.
Laga nos tur corda cu sin Pas y sin Santidad (Hebreonan 12:14) ningun hende lo mira Dios, asina ta laga nos probecha awor cu tin tempo ainda pa biba na pas cu otro, y no laga e fout di un persona bira un goso pa nos, pasobra Dios a duna nos e ministerio di reconciliacion. Esey ta nos deber pa pratica.
E mundo aki ta yena cu tur sorto di maldad pesey e palabra di Dios ta bisa lo siguiente: Y no sea conforme e mundo aki,ma sea transforma pa medio di renobamento di boso mente, pa boso por comproba kico ta e bon, y agradabel y perfecto boluntad di Dios.
Ora un hende ta bully, chercha, y haci bofon di su prohimo nos por constata cu lamentablemente su mente no a wordo renoba, pasobra e no ta canando den e boluntad di Dios.
Asina manera esnan cu a wordo scohi di Dios, bisti un curason di compasion, carinjo, humildad,manse dumbre y pasenshi. ( Colosensenan 3:12).
Nos mester sinja nos yuinan cu Dios ta bisa pa stima bo prohimo manera bo mes, y no haci cu otro locual bo no kier pa nan haci cu bo.
Sinceramente, Pastor Marcel Balootje
