Ki ora nos ta cana den scuridad?
Ora nos ta lubida for di unda Cristo Hesus a saca nos.
Ora nos ta lubida con E a yuda nos.
Ora nos ta balora placa mas cu hende,
Ora nos ta purba kibra nos prohimo pa motibo di envidia diabolico.
Ora nos no por pordona nos propio, yiu, esposa , of famia cu ta biba den cas cu nos.
Ora falta di pordon ta goberna nos curason, cu nos no ta tene cuenta cu esey ta causa di nos malesa.
Ora nos no kier arepenti, laga los y biba na pas.
Ora nos ta papia y insulta, y rebaha sin tene cuenta cu curason di otro( Efesionan 4:29).
Ora envidia y amargura ta domina nos curason y cu nos no tin pas.
Ora cu nunca un hende a haci bo nada pero su simpel presencia ta molestia bo.
Awor compronde esaki bon y sali for di scuridad:
No ta importa cuanto placa bo tin.
No ta importa con bon studia bo ta.
No ta importa e posicion cu bo tin.
Tampoco cuanto hende tin rond di bo.
Laga cosnan bieu bay, y stop di wak atras.
Un hende mester tin temor di Dios y respet pa hende.Nos mester respeta tur hende.
Y esaki ta e mensahe cu nos a tende di dj’E , y ta anuncia na boso,cu Dios ta lus,y den dj’E no tin nada, nada di scuridad,Si nos bisa nos tin comunion cun’E y sinembargo, nos ta cana den scuridad, nos ta ganja y no ta practica e berdad. Ma si nos cana den lus mescos cu E ta den lus, nos tin comunion cu otro , y e sanger di Hesus su Yiu ta limpia nos di tur pica.(1 Juan 1:5-7).
Cuanto dolor nos tin awendia, di mira con nos hobennan ta cana den scuridad, y e gran tristesa ora hende grandi cu mester sa mihor, ta den scuridad extremo.
Hopi mayor no ta consciente cu locual mucha nan ta haci pafo di cas, ta ripiticion di locual nan ta ricibi den cas.
Nos bida como mayor mester ta un ehempel, un testimonio di bondad pa nos yiunan.
No solamente nos tin di papia, pero nos tin cu biba locual cu nos ta papia, y eyden nos lus ta briya.
Boso ta e lus di mundo, un stad situa riba un sero no por keda scondi.
Laga boso lus briya, dilanti di hende di tal manera cu nan por mira boso obranan, y glorifica boso Tata cu ta den cielo.( Mateo 5:14-16).
Como hoben bo lus no por briya, cu ladronisia, atraco, violencia,abuso,tiramento, palabra sushi, bistimento indecente, bendemento di curpa, calumnia y arogancia, tur esaki ta senjal di scuridad profundo, pa cual bo mester arepenti y entrega bo bida na Cristo Hesus.
Mescos cu si bo ta un tata, un lider, un hefe na trabao,un persona den posicion di importancia, semper bo mester cende lus tur caminda cu bo bay, laga mal influencia para un banda, pone tur mentira, y malicia un banda, y haci tur locual ta posibel pa bo lus briya, pasobra esey ta deseo di Dios.
Y e ora ey Hesus a bolbe papia cu nan,bisando: Ami ta e lus di mundo, esun cu sigi Mi lo no cana den scuridad , ma tin e lus di bida.( Juan 8:12).
Pasobra esun cu ta haci maldad, ta odia e lus,y no ta bin na e lus,pa su echonan no wordo exponi.( Juan 3:19).
Aunke scuridad ta purba goberna e mundo aki , cu inmoralidad, laga nos sigi Cristo Hesus.
Sinceramente, Pastor Marcel Balootje
