Diamars pasa, Aruba a celebra un di su tradicionnan cultural mas vibrante: Dia di San Juan – Dera Gay. Esta fiesta tradicional, cu tin raiz profundo den nos herencia cultural, a tuma luga den diferente bario rond di nos isla, organiza cu gran dedicacion pa organisacionnan y clubnan comunitario, y cu gran participacion di pueblo.
Entre e actividadnan mas popular tabata e tradicional baile di San Juan, baile di bandera, grito di gay, y e emocionante competencia pa “mata e gay”. Luganan cu a forma parti di e celebracion e aña aki ta: Centro di Bario Brazil, organiza pa Gucci Dancers; Centro di Bario Savaneta; Club Sportboy na Angochi; Centro di Bario Noord; Centro di Bario Playa Pabao; Paseo Herencia.
E programanan tabata enrikeci cu presentacion di gruponan tipico, gruponan di baile folklorico, y mucha di nos cultura autoctona. Pueblo a mustra gran interes y e eventonan tabata bon bishita y disfruta pa hende di tur edad.
Departamento di Cultura Aruba ta gradici tur organisador, participante y bishitante pa nan entrega y pasion pa mantene bibo e tradicion di San Juan – Dera Gay. Nos ta comprometi pa sigui motiva y sostene e celebracion aki den tur su forma, pa nos pueblo y specialmente e generacionan nobo por sigui celebra y aprecia nos identidad cultural Arubano.
Danki na tur esnan cu a colabora, a contribui, y a duna bida na e fiesta di pueblo.
