Minister di Infrastructura, Vivienda y Comunicacion, drs. Rene Herdé, a comparti cu Gobierno ta sumamente contento cu Burubundu Residences finalmente ta acercando na fase di ehecucion despues di hopi aña di preparacion.
Segun e minister, e proyecto ta un iniciativa cu originalmente a cuminsa durante gabinete AVP 2009-2017 y cu awor ta drenta su fase final preparatorio pa posteriormente cuminsa cu construccion.
Burubundu Residences lo ta situa den area di Pos Chiquito/Burubundu y ta visualisa como un comunidad completamente nobo pa Aruba, cu aproximadamente 850 te 1000 vivienda, incluyendo casnan familiar, apartamento y flattan moderno.
Minister Herdé a enfatisa cu e vision ta bay mucho mas leu cu simplemente construi casnan. Segun Herdé, e meta ta pa crea un bario moderno cu hopi espacio berde, area recreativo, facilidadnan deportivo y oportunidadnan pa actividad economico.
“Nos no ta papia solamente di casnan, pero di un comunidad completamente nobo,” segun Minister Herdé.
E proyecto ta inclui un gran “curason berde” central, rond di cual e diferente area residencial y facilidadnan comercial y social lo wordo desaroya. E diseño ta enfoca riba trankilidad, miho calidad di bida y un balance entre infrastructura y naturalesa.
Gobierno ta comparti cu informacion tocante e proyecto actualmente ta disponibel na edificio di DIP/DOW, unda comunidad por mira e plannan, haya mas informacion y comparti comentario of sugerencia.
Segun Minister Herdé, den e proximo dos lunanan Gobierno kier finalisa e fase preparatorio pa despues invita inversionista y companianan di construccion pa participa den ehecucion di e proyecto.
E construccion lo tuma luga den diferente fase y lo sigui tur procedimento legal conforme cu e Landsverordening Ruimtelijke Ontwikkeling (LRO).
Gobierno ta considera Burubundu Residences como un paso importante rumbo na un futuro mas sostenibel y inclusivo pa Aruba, cu mas oportunidad di vivienda pa comunidad y un enfoke fuerte riba calidad di bida y desaroyo urbano moderno.
