Mescos cu un yiu recien naci ta busca lechi di su mama asina nos mester busca cara di Senjor den tur locual nos ta haci, pasobra haci boluntad di Dios, ta lo mehor cu nos por haci den nos bida.Pasobra palabra di Dios ta bisa den Jeremias 29:13: Y boso lo busca Mi y hanja Mi,ora boso busca Mi di henter boso curason.
Hopi biaha hende ta busca, y hende ta pidi of hende ta bati, y nada no ta sosode pasobra Dios ta wak e curason cual bo ta pidi cune, pasobra no lubida cu Dios ta Todopoderoso, Omniporente y Soberano, pues nos Dios sa tur cos y e ta riba tur cos, y e tin poder pa scrudinja curason, y ora nos pidi algo cu orguyo den nos curason, pa nos broma cune y mustra otro con grandi nos ta,Dios no ta contesta, pero ora nos pidi algo pa duna Dios Gloria, y mustra con grandi Dios ta , nos ta logra tur cos.
No lubida cu tur cos ta sosode cu poder di Dios, no cu deseo di hende:
Moises a bisa e pueblo: E Egipcionan cu boso ta mira awe,hamas y nunca boso lo bolbe mira nan. Senjor lo bringa pa boso y boso lo keda keto. Y Senjor a bisa Moises pa kico bo ta sclama na Ami, bisa e yuinan di Israel pa sigi dilanti .Y pa loke ta abo, lanta bo bara y bo man over di e laman y dividi’e y e yuinan di Israel lo pasa meymey di laman riba tera seco.(Exodus 14:13 -16).
Elias a pidi Dios baha candela for di cielo pa mustra con grandi Dios ta, cu e por bira e pueblo bek for di idolatria,y Dios a demostra esey.
Rey Ezequias a pidi Dios pa derota rey Senaquerib di Syria, pasobra Ezequias su defensa tabata kibra, y pa demostra cu tin Dios na Israel, y Dios a haci esey.
Ora nos ta pidi Dios pa sanacion, liberacion, y kibra cadena den nos bida y haci husticia pa nos, nos tin cu pidie pa demostra Su poder, pa nos duna Dios tur e gloria, y mundo henter lo mira kico Dios por haci.
Nada ta sosode di nos mes, tur cos ta sosode ora nos Dios pone su man.( 2 Cronicanan 7:14).
E humildenan lo mira esaki y keda contento, boso ta busca Dios boso curason lo biba ( Salmo 69:32).
Dios ta wak tur curason, y Dios sa tur cos, ta dificil pa hende pidi malo pa otro hende y kere cu Dios ta complace cu nan. Corda riba e palabra di Dios cu ta bisa : Mira pa ningun hende no paga malo cu malo, ma semper busca loke ta bon pa otro y pa tur hende.( 1Thesalonisensenan 5:15).
Pasobra e gracia di Dios a parese treciendo salbacion na tur hende, sinjando nos pa renuncia impiedad, y deseonan mundano y pa biba huicioso, hustu y santo den e siglo presente.Wardando riba e speransa bendiciona y e aparicion di e gloria di nos gran Dios,y Salbador Cristo Hesus.( Tito 2:11-14).
Proverbionan 8:17: Mi stima esnan cu ta stima mi y esnan cu busca mi cu diligencia lo hanja mi.
Pa loke ta abo mi yiu Salomon,conoce e Dios di bo Tata, y sirbi’E cu henter bo curason, y cu un alma boluntario, pasobra senjor ta scrudinja tur curason y ta comprende tur intencion di e pensamentonan , si bo busc’E, E lo laga bo hanje, ma si bo bandon’E ,E lo rechasa bo pa semper.( 2 Cronicas 28:9).
Sinceramente, Pastor Marcel Balootje
