Oranjestad, 13 di Juli 2025 — Preocupacion ta crece despues cu e yate local Energy, cu number di registracion A-30, no a regresa tera segun plan, despues di sali pa bay pisca diasabra mainta cu cuater homber Arubiano abordo.
Pa awor, tur intento pa haya contacto of localisanan a resulta sin exito, mientras cu autoridadnan, famianan y amigonanta sigui busca sin perde speranza.
E tripulantenan riba Energy ta: Davey Croes, Marcelo Heyden, Jarred Croes, y Aischell Tromp. Nan a sali for di Surfside Marina banda di 6:30 di mainta, diaiasabra 12 di juli pa bay pisca y mester a bolbe pa 4’or di atardi.
Te cu oranan di anochi, famia no a haya ningun yamada ni señal cu nan a yega tera, loke a haci cu nan a bati alarma y a move autoridadnan pa tuma accion de inmediato.
Guardacosta a confirma cu nan a haya e yamada diadomingo marduga y a immediatamente a activa operacion di buskeda, usando avion, helicopter, y boto di tipo Metal Shark. Te awor, no a logra haya ni boto ni tripulantenan.
Segun famia y amigonan, e grupo aki ta hendenan cu hopi experiencia riba lama, y a sali mas biaha hunto pa bay pisca. P’esey e situacion ta crea hopi incertidumbre y tension, ya cu no tin indikacion si a trata di maltempo, fayo mecanico, of otro tipo di problema den lama.
SOLO DI PUEBLO ta pidi atencion y solidaridad, y tur cu por yuda den buskeda ta wordo invita pa pone man den e esfuezo.
Nos ta sperando cu e buskeda lo trece bon noticia y cu tur tripulantenan por yega bek sano y salvo.
