Servicio Informativo di Gobierno (Bureau Voorlichting – BUVO) ta gradici tur persona cu a sigui presentacion di e resultado provisional di eleccion 2024 riba e websitenan di gobierno, www.overheid.aw, www.gobierno.aw y www.government.aw, riba e anochi di eleccion.
Mescos cu tabata cu e eleccion pasa, e website a haya un excelente acogida.
BUVO ta gradici e dinamico y experto team di Directie Informatievoorziening en Automatisering (DIA), cu ta encarga cu e maneho tecnico di e websitenan menciona, pa e excelente cooperacion, apoyo y conseho valioso den e periodo di preparacion pa eleccion 2024. Ademas nos gradicimento special na DIA pa desaroya e tremendo aplicacion pa e website di gobierno cu a haci e presentacion aki posibel, como tambe pa e apoyo y colaboracion inmenso ricibi pa e presentacion di e resultadonan di eleccion, riba e anochi di eleccion. Tambe un danki special na DIA pa traha e Excel sheet sumamente popular pa yena resultado di eleccion. Varios medio di comunicacion y empresa, a haci uzo di e formulario, por ehempel como pop up cu e resultado di eleccion.
Tambe un danki grandi na e coleganan di BUVO, pa nan aporte durante temporada electoral y riba e anochi di eleccion. Danki tambe na SIM Caribbean pa e sosten ricibi.
