No ta facil lanta un mucha den e tempo di awor. Hopi distraicion, cos a bira caro, situacion mundial di mundo ta bayendo den mas scuridad, hende tin cu traha mas pa hanja placa pa mantene famia, y nos muchanan no ta hanjando e atencion necesario.
Ta keda na cada mayor pa demostra amor y responsabilidad pa nan yuinan, y corda cu nan tin un obligacion cu Dios.
Malicia , maldad, y inmoralidad ta jaag tras di muchanan, wak cuanto caso di abuso di mucha nos tin, wak cuanto hende ta sinti un placer den haci danjo fisico, mental, y spiritual na un mucha.
Wak con maldad a aumenta cu awor tin gruponan cu ta produci video di maldad pa wordo usa contra mucha.
Hesus a bisa den Lucas 17:1 papiando cu Su disipelnan :Ta inevitabel cu tentacion lo bin, ma ay di esun pa medio di kende nan ta bin.
Lo tabata mihor pe si un pedra di molina a wordo cologa na su garganta, e a wordo tira den laman, cu si e mester haci un di e chikitonan aki trompica.
E asunto di pone un mucha trompica a para bira un industria,door di sensualidad, cu canticanan sensual, cu media, cu tur sorto di informacion falso y malo riba internet, scucha y mira videonan sensual constantemente , tin hende cu ta yama nan mes influencer cu ta dedica nan mes na esey , pasando bao di capa di ta artista.
Pesey awor mas cu nunca mayor mester pone atencion, pa nan yiu, no laga bo yiu keda serca ken cu ta ni tampoco na unda cu ta, pasobra e danjo cu wordo haci na bo yiu, ni maske ley sera e persona 250 anja, y bo exigi danjo y perhuicio, e dolor y e trauma causa ta duro pa kita, solamente Dios por restaura mente y curason di un mucha.
E asunto aki ta bay mucho mas serio di locual cu nos ta kere, pasobra ta parce cu un hende ta lucha pa lanta su yiu bon y decente, otro banda e enemigo ta drumi ta loer con e por devora e mucha.
Nos oracion pa nos muchanan mester ta constant, nos wowo mester ta habri, nos cuido y nos defensa mester tey di dia y anochi, nos yuinan mester di oracion, y e palabra di Dios mester wordo sembra den nan curason.
Antes bo por laga bo yiu combersa cu un hende mas grandi cu nan, pero awor nos ta mira cu tin hende cu no solamente ta grandi na curpa, pero tambe ta grandi den maldad, inmoralidad y bagamunderia.
Nos no por como mayor permiti pa otro hende mester pone atencion na nos yuinan ta nos mes tin cu pone.
E atencion pa nos yiu ta nos prioridad, gym y happy hour, y bebemento di cerbes tur atardi no tin mas balor cu nos yuinan,traha overtime no tin mas balor cu nos yuinan, placa no tin mas balor cu nos yiu. E paranda, e byside no tin mas balor cu bo yiu.
Tur esnan cu a pone nan yiu un banda, y pone paranda y bebemento y wega di placa na prome lugar lo lamenta, pasobra cuido di yiu ta un obligacion y un mandato di Dios.
Ora nos lanta nos yuinan den e berdad y disiplina di Dios, ta un garantia cu e mucha lo lanta serio integro, cu respet pa su mes y pa otronan.
Y tur esey mester cuminsa na cas, caminda amor tey, papai y mamai mester uni hunto pa cuido di na yiu.
Ban pone tempo pa nos yuinan.
Sinceramente, Pastor Marcel Balootje
