Diaranzon merdia, Promer Minister Wever Croes a informa cu el’a haya un carta di CAFT cu ta conseha Hulanda pa duna Aruba un aanwijzing.
Cobransa di Belasting;
Esaki no kemen cu e aanwijzing a wordo duna, pasobra ainda mester atende esaki cu Hulanda y por bringa esaki.
Riba algun punto, tin poco problema di comunicacion. Por ehempel, segun CAFT e no a haya splicacion di cobransa di belasting, pero directora di belasting a confirma cu nan A manda tur informacion.
SOLO DI PUEBLO ta puntra: dicon CAFT kemen cu e no a haya e informacion? Ta ki wega esaki ta?
Serlimar:
Tambe riba Serlimar, CAFT ta pidi pa haci cosnan, pero te Surceance van Betaling cu ta andando ta stroba gobierno di atende cu Serlimar, promer minister a bisa.
Promer Minister a pidi pueblo pa keda trankilo, pasobra su gobierno lo lucha cu tur su forsa pa atende cu esaki. N’e momento aki no tin aanwijzing ni KB. Ta un carta di conseho tin.
PPP Projecten:
Otro punto di CAFT ta PPP projecten. Awor CAFT ta precupa cu e gastonan di PPP projecten. Pero ora cu nan mester a precupa, nan a permiti Eman di cera dealnan di PPP, Sra Wever Croes a sigui bisa.
Ta reconoce y subraya e seriedad di e situacion financiero di pais. “Nos ta precupa”, pero nos no ta bin papia di dje, pa no lanta precupacion.
Gasto di personal;
Segun CAFT cu Aruba no ta cumpliendo cu reduci gasto di personal. Segun Gobierno cu SI ta cumpliendo. A puntra CAFT pa nan cifranan, pa asina por analisa y corigi nan conclucion.
“Nos tin un impase cu CAFT” y pesey a busca un otro instancia manera IMF pa intermedia.
Ayudo di Likidez a wordo tranca:
Mientrastanto 4 miyon di ayudo pa liquidez a wordo wanta, unda Gobierno di Aruba lo no haya 4 miyon.
Tambe Hulanda tin problema cu e pago di 5% di salario di ambtenaarnan, pasobra nan no ta contento cu Parlamento a trece dos amienda. Pa esaki Minister President a bisa cu esaki ta un decision di parlamento. Sinembargo riba e pago di 5% lo keda papia cu Hulanda.
Si yega asina lew cu Aruba haya un aanwijzing, lo nos sali di e reunion na Hulanda, crusa caya y entrega un keho na Raad van State. Nos lo bringa e aanwijzing, si encaso e yega asina lew, promer minister a finalisa bisando.
