Den boca di pueblo ta surgi e pregunta ta kiko precies ta e agenda di CAFT?
CAFT ta poniendo constantemente presion enorme riba Gobierno di Aruba pa tuma medidanan drastico contra pueblo di Aruba.
CAFT ta lubida cu mundo te ainda ta den un pandemia y a bini aserca e guera na Ukraine. Tur esakinan tin impactonan grandi y
profundo den nos sociedad.
Den e mundo complica y constantemente cambiando di awendia tur cos ta interconecta. Finansas Publico di Gobierno di Aruba no ta para riba su so. Ki bal cu Finansas Publico ta na ordo y un parti grandi di pueblo di Aruba ta biba den un miseria y pobresa sin
precedente y alavez sociedad por wordo confronta cu aumento di problemanan serio di entre otro criminalidad, salud mental y desempleo.
Esakinan sigur tin na costo pa comunidad! Ta obvio cu tur gobierno cu amor pa su pueblo kier un Finansas Publico
sano, pero no mester lubida si e calidad di bida (dignidad) di e ser humano.
Bida hamas por ta cifra so: cifra aki y cifra aya.
E maneho di e pais mester ta holistico usando na e mihor manera recursonan humano, di capital y digital den e tempo apropia. E problema cardinal di Finansas Publico na Aruba ta e debe nacional cu actualmente ta super halto den comparacion cu nos Gross Domestic Product (GDP). Pakiko CAFT no ta bini cu un plan finansiero socio-economico pa refinansia y parcialmente ‘kwijtscheld’ (regala) debenan y pa pone tambe fondonan disponibel pa Aruba por haci inversionnan productivo y innovativo?
By the way Nacionnan Uni a reconoce y ta promove cu mester combati pobresa na mundo, SDG # 1 No Poverty, y awor CAFT kier net lo contrario door di yuda crea pobresa na Aruba. Ta di spera cu riba nivel di Gobierno di Aruba y Gobierno di Hulanda sano huicio ta prevalece pa no perde for di bista cu e ser humano su calidad di bida mester keda central den un mundo ‘nobo’ aki.
