Oranjestad – Economia di Aruba ta recuperando bon. E cantidad di persona y di empresa cu ta recuri na e medidanan di sosten ta cada bes menos. P’esey Colegio di supervision financiero di Aruba (CAft) ta sali di e base cu e medidanan aki lo finalisa den e di cuater kwartaal di 2021. CAft no a ricibi ainda e proyecto di presupuesto di 2022. Ta necesario pa Aruba tuma medida pa realisa un ekilibrio presupuestario na 2022, pa den e añanan siguiente e por cuminsa paga e debe publico, cu ya tabata masha halto prome cu e crisis di e pandemia di COVID-19. CAft ta urgi gobierno pa elabora e proyecto di presupuesto mas pronto posibel, pa por aprob’e prome cu dia 15 di december di e aña aki.
Proyecto di presupuesto 2022
Segun Constitucion di Aruba, mester a presenta e proyecto di presupuesto di 2022 na Parlamento dia 1e. di september. Te awe esey no a sosode ainda. CAft ta enfatisa e importancia di aprobacion di un presupuesto na tempo. Cu recuperacion di turismo, economia tambe ta mehora atrobe. Aruba ta sali di e punto di bista di un crecemento economico di 13,9% pa 2021 y den algun sector ya por ripara escasez di personal. P’esey CAft ta insisti pa pone fin na sosten salarial na termino mas cortico posibel. Tambe ta importante pa reclama mas pronto posibel e subsidionan di salario paga di mas.
Debe publico di Aruba aworaki ta monta na 5.600 miyon florin. Pa no laga e debe publico sigui aumenta, pa cuminsa, un ekilibrio presupuestario pa aña presupuestario 2022 ta necesario. P’esey ta di importancia pa, ademas di stimula recuperacion economico, gobierno nobo tuma tambe medida pa reduci gasto. E reformanan di e agenda di ehecucion mester contribui na mehoracion di finansa publico y na reduccion di e debe publico. CAft ta urgi Gobierno pa inserta den e proyecto di presupuesto un planificacion di mas aña y pa haci transparente ta kico ta pretende di logra cu e reformanan.
Sostenibilidad di debe publico
Aruba ta para dilanti di un gran reto pa reduci e debe publico y logra hib’e na un nivel sostenibel mas pronto posibel. Aruba mester realisa un surplus mas pronto posibel, ya cu esey ta e unico manera pa reduci e debe nominal y e gastonan di interes relaciona cu ne. Asina, por ehempel, Aruba ta paga aworaki 5% di e PIB na interes pa aña. Esaki ta bay a costo di otro gasto riba presupuesto, manera gasto di enseñansa of pa combatimento di pobresa. Ademas CAft ta enfatisa e importancia di realisa for di 2023 un surplus di financiacion di 1%.
E reformanan
E reformanan, manera acorda den e pakete di medida pa Pais Aruba (landspakket), ta esencial pa impulsa crecemento economico. Mester reduci e gastonan di actividad empresarial y e gastonan administrativo. Un reforma fiscal integral cu enfasis riba simplificacion ta importante. Acumulacion di legislacion a crea un sistema compleho cu un gran cantidad di gasto deducibel, exencion y excepcion. Esaki ta aumenta e carga administrativo pa e dunadonan di trabou y pa Servicio di Impuesto y ta dificulta simplificacion y automatisacion. Digitalisacion y intercambio di dato entre e diferente servicionan di gobierno lo reforsa e capacidad di actuacion di Servicio di Impuesto y, consecuentemente, lo aumenta cumplimento di obligacion. Tambe reforma den seguridad social y cuido ta necesario pa garantisa sostenibilidad di e sistema aki. Ta di sumo importancia pa introduci na termino cortico economisacion den e sistema di cuido di AZV como prome paso dirigi riba cuido sostenibel.
Dia 28 y 29 di october 2021 CAft a haci un bishita na Aruba. A hiba combersacion cu, entre otro, Gobernador, Ministro di Finansa y Cultura, Conseho di Ministro y e Comision Parlamentario di Finansa, Organisacion Gubernamental, Cultura y Deporte (CFOCS). Banda di esey CAft a haci bishita na Banco Central di Aruba (CBA), Banco di Seguro Social (SVb) y Aruba Hotel and Tourism Association (AHATA). Prome cu e biahe di Colegio aki e presidente a haci un bishita na Parke Nacional Arikok. Na e ocasion ey a inform’e di e retonan di conservacion di naturalesa y e potencial economico di e parke aki pa turismo.
