Serlimar tin 183 trahador y 56 persona ‘contratista’ pa un total di 239 trahador

Dialuna mainta Minister di Finansas, Sra. Xiomara Maduro a splica riba diferencianan cu tin entre Gobierno y Serlimar riba 13 punto, y cu algun siman pasa CAFT a menasa Gobierno di Aruba cu un aanwijzing.

Un di e puntonan, esta punto #2 den e carta ta encera Serlimar.

Aki Gobierno a prespuesta 3.4 miyon florin pa manda pa Serlimar, pa no solamente tene e compania habri, pero pa nan por keda maneha e servicio di desperdicio na Aruba. CAFT ta exigi Gobierno pa corta e 3.4 miyon y no manda ningun florin pa Serlimar.

“Locual ta wordo pidi dor di CAFT, lo hiba como consequencia cu Serlimar lo mester bay falliet, tur hende tin cu bay cas y Aruba ta den problema mas grandi ainda pa loke ta maneho di desperdicio”, minister Xiomara Maduro a bisa. Serlimar a yega na acuerdo cu creditornan pa no pidi pa falliet di Serlimar. Si no duna Serlimar e placa aki, e compania ta bati bancarota.

E ora mester puntra:

Kico ta realmente e plan di CAFT/Raymond Gradus? Pa realmente doek op Serlimar, manda hende cas y orcherstra un chaos na Aruba pa cu sushedad?

Pasobra ningun otro compania tin e capasidad pa deal cu 80% di desperdicio den un of dos dia. Pues, lo bay crea un situacion desastroso, unda casnan lo keda cu nan sushedad, creando tur sorto di risico, malesa, hincando nos den un otro problema.

Esaki ta un decision hopi drastico diparti CAFT/Raymond Gradus, y kisas e mester pensa, si algo asina sosode na Hulanda, kico e ta pensa? Si su bario y su cas keda di un dia pa otro sin servicio di despredicio, con e ta haye?

Nos por compronde cu su nanishi ta hinca den cifra, pero patras di cifra tin hende, bida di hende, salud, malesa, etc. Bo mester por sa cu pa cada decicion riba papel, tin consequencia su tras.

Segun nos informacion, aki ta trata di mas di 200 empleado cu Serlimar tin cu tambe ta crea otro problema, pasobra lo tin mas di 200 hende na cas, sin trabao, sin entrada den forma abrupto y cada famia tin su gastonan como su debenan.

Realmente SOLO DI PUEBLO ta cuminza haya duda den e “bon” intencion di CAFT-Raymond Gradus, maske nos por mira cu e Secretario di Estado Van Huffelen a cay nos simpatico y parce tin mas oido. Den corto tempo el’a bini Aruba na 3 ocacion unda e ta parce di tin sentimento y kier progreso pa e comunidad.

Pues, e ora nos ta para den un incertidumbre, pasora CAFT-Raymond Gradus parce no kier rasona y kier keda zweep henter un pais, exigiendo pa stop 3.4 miyon pa Serlimar, pero sin trece solucion, sin bisa ken lo sigui atende cu pikimento di sushi y su procesamento.

Minister Xiomara Maduro a bisa cu el’a tuma nota di e critica di opositornan manera Marisol Tromp y Mike Eman. Ambos ta critica cu Gobierno no a cumpli cu conseho di CAFT. Pero, nan sa kico nan ta pidi? Nan sa ki consequencia tin si cumpli cu deseo di CAFT tin? Kico nan kier? Manda Serlimar falliet? Cera Serlimar y manda tur hende cas?

SOLO DI PUEBLO ta asombra con CAFT kier impone decision riba pais Aruba, sin midi e impacto di nan decicion y finalmente lo ta bisando Aruba: “boso zoek het maar uit”

LEAVE A REPLY

Please enter your comment!
Please enter your name here