Minister di Salud Publico, Asunto Social, Cuido di Adulto Mayor y Cuido di Adicto, drs. Mervin Wyatt-Ras, a asisti na un presentacion importante na Instituto di Calidad (Kwaliteitsinstituut), na unda e mandatario a ricibi un splicacion amplio for di e director Jayburtt Dijkhoff, tocante e funcionamento y meta di e entidad aki.
Segun Dijkhoff, ta desde 2014 a pasa un ley pa garantisa un nivel halto di calidad den cuido di salud, pa medio di un instituto di calidad. Sinembargo, te na 2019 a implementa e Instituto di Calidad, cu ainda ta resorta bao supervision di DVG, y no como un organo independiente manera e ley ta indica. Ta trahando duro pa yega na un situacion den cual Instituto di Calidad por opera como un entidad Sui Generis, independiente for di otro instancia gubernamental. Un entidad cu autonomia total ta esencial pa implementa e nivel di transparencia y control cu e sistema di cuido ta exigi.
Durante e bishita, a enfatisa riba e importancia di evaluacion y autorisacion di profesionalnan di cuido cu kier traha na Aruba. Tur profesional di cuido mester cumpli cu cierto rekisito, entre otro di registracion den AruBIG. E proceso aki ta permiti pa e profesional haya su licencia pa traha legalmente na nos pais.
Un otro pilar clave di e instituto ta e Conseho di Calidad, un organo cu ta desaroya normanan, protocol y regla di maneho pa sigura un cuido responsabel y modernisa constantemente segun e necesidadnan di comunidad.
Un sistema di cuido digno y eficiente mester inclui un mecanismo pa defende derecho di pashent. Tur ciudadanon tin derecho riba un cuido di calidad. Si un pashent no ta satisfecho cu e cuido ricibi, e mester sa unda e por presenta su keho. Transparencia y responsabilidad ta fundamental den un sistema di cuido cu ta sirbi comunidad
Cu e bishita aki, Minister Wyatt-Ras ta sigui demostra su compromiso pa fortalece e base institucional y sigura cu tur ciudadano na Aruba por conta cu un sistema di salud di calidad, cu ta transparante y eficiente.
