Riba dia 9 di augustus 2025, Claudius Philips “Mighty Talent” ta ricibi un “Lifetime Achievement Award” durante e Calypso Showdown presenta pa Stichting Musica.
E contribucion di Claudius Philips na e mundo musical di Aruba, en particular den e genero di Calypso, ta impresionante. Mighty Talent tin e record como Calypsonian cu a gana e corona di Calypso King na mas hopi ocasion; semper treciendo mensahenan sociopolitico skerpi dilanti, cu un toke di dobel sinti y unificando e comunidad di “pariba” y “pabao” cu su combinacion di Ingles y Papiamento. Un berdadero bos di pueblo, cu comunidad henter tabata anticipa pa scucha durante Calypso contest y Aruba Caiso & Soca Monarch, specialmente “e extra couplet” cu e tabata estrena durante e competencia final.
E aña aki Aruba lo conoce e “Calypso Showdown” riba dia 9 di augustus den centro di San Nicolas na Kulture Café. Diescinco Calypsonian lo competi pa e corona di Aruba Caiso Monarch 2025 den un ambiente vibrante y acompaña pa un All Star Band bao direccion di director musical Dwight Leoneta. Publico presente lo por sinta y mira e show di cada participante, pa asina scucha cada palabra, cada melodia y cada letra di cada Calypso.
Durante fin di siman Stichting Musica a sorprende e legendario Claudius Philips den un forma unico, pa asina extende un invitacion special na su persona pa atende e magno festival “Calypso Showdown”, na unda cu e lo ricibi su “Lifetime Achievement Award”. Mighty Talent a ricibi e invitacion y momento cu honor y orguyo. Presidente di Stichting Musica, sra. Edwina Werleman a amplia cu e presencia di Mighty Talent na e Calypso Showdown lo ta sumamente balioso pa e organisacion y e publico presente, pero tambe lo ta pa inspira e generacion nobo y amantenan di Calypso.
E impacto cu Claudius Philips a causa den e mundo di Calypso na Aruba ta grandi y sigur ta algo di elogia y celebra mientras cu e ta na bida. Pa e motibo aki Stichting Musica ta invita henter pueblo di Aruba, en particular esnan cu ta sostene nos cultura, musica y arte local, pa ta presente na e Calypso Showdown riba dia 9 di augustus na Kulture Café pa asina honra e baluarte musical y conoce nos Aruba Caiso Monarch 2025. Un presentacion di Stichting Musica, conhuntamente cu Setar NV y cu aporte di Brouwerij Balashi. Kaarchinan di entrada ta obtenibel via Pay.aw y tambe na CITGO Boulevard y CITGO Essoville.
