E evento “Business Plaza-Get Started!” manera ta conoci pa algun aña caba ta dedica na tur hende cu ta desea di lanta un negoshi of cu recien a cuminsa un negoshi. E biaha aki nos edicion ta dedica specialmente na e area di San Nicolas, pues Business Plaza-Get Started! lo ta tumando luga na San Nicolas dia 23 di november 2022, di 5or di atardi pa 9or di anochi na Kulture Café Aruba.

Camara di Comercio y Industria (KvK) a ricibi e peticion na varios ocasion di parti di, tanto comerciante como tambe ciudadano di San Nicolas en particular, pa organisa y trece mas actividad empresarial den e area di San Nicolas. Alabes, e Ministerio encarga cu asunto economico y desaroyo sostenibel tin como meta, entre otro, pa desaroya centro di ciudad di San Nicolas y probecha di oportunidadnan cu San Nicolas ta brinda.

Den e cuadro aki, KvK, como un di su tareanan pa stimula comercio na Aruba y brinda informacion y apoyo na comerciante y futuro comerciante, ta haya importante pa duna atencion e biaha aki na e area di San Nicolas pa medio di su conocido evento informativo “Business Plaza-Get Started!” cu e topico: “Let’s talk business in San Nicolas”.  

Business Plaza-Get Started in San Nicolas ta posibel danki na nos sponsor principal Guardian Group y tambe nos colaborador Fast Delivery Services

Presidente di directiva di KvK, sra. Monica Kock lo habri e programa, sigui pa algun palabra di Minister di Asunto Economico, Comunicacion y Desaroyo Sostenibel, sr. Geoffrey Wever.
E presentacionnan ta consisti di Chris Kross y sra. Chamilla Williams cu lo conta un poco di nan experencia como comerciante cu ta haci negoshi, entre otro na San Nicolas; Rocio Burgos di Meliorate Branding Boutique cu lo comparti su conocemento tocante aspectonan basico di marketing; Gilmar Croes di Monarch CPA LLC lo duna informacion tocante impuesto pa negoshi chikito y por ultimo, Nadine Antersijn lo splica pakico servicio na cliente ta crucial pa bo negoshi. Ademas, representantenan di Qredits, Departamento di Asunto Economico, Universidad di Aruba, Guardian Group y KvK lo tin un booth pa brinda informacion. 

Na final di e presentacionnan, publico ta haya oportunidad pa haci pregunta na e oradornan. Manera ta custumber, nos ta clausura cu un ora di networking. 

Registracion ta habri pa un y tur cu tin interes pa atende e evento aki via e siguiente link: https://forms.gle/2Ey3nZn53Hkn5bsKA. E evento aki ta completamento gratis. Tene na cuenta si cu esaki no ta garantisa bo cupo riba dia di e evento, pues percura pa yega trempan pa bo por sigura bo luga. 

Pa mas informacion por tuma contacto cu KvK via email: businessinfo@arubachamber.com of por yama na: 582-1566 ext. 30/35/42.

LEAVE A REPLY

Please enter your comment!
Please enter your name here