En conexion cu e mantencion grandi cu lo cuminsa e prome siman di juni awor lo tin varios cambio na Museo Arqueologico Nacional Aruba (MANA). MANA ta consisti di diferente edificio monumental y edificionan moderno. Intencion ta pa MANA bira multi-funcional pa asina maximalisa e experiencia di cada bishitante.
For di awor caba bishitantenan ta confronta algun cambio den Cas Dundun, antesala di exposicion permanente. A kita vitrina, paneel y obhetonan cu ayudo di personal di “Dienst Openbare Werken” (DOW). Pa fin di luna lo tin cambio den e entrada pa publico, cual lo bira na e edificio moderno mas pabou (serca di e parking lot).
Trabounan den cuadro di e proyecto “Manteniendo nos Herencia Bibo den Tempo” lo reforsa e exposicionnan existente y lo bin cu mas exposicion. Entre otro lo enfoca riba e edificionan monumental y nan historia relaciona cu e famia Ecury. Un otro exposicion lo enfoca riba balornan di Aruba den diferente epoca for di e prome habitantenan di Aruba te awendia. E proyecto concerni ta bira realidad danki na sosten di Ministerio di Cultura, UNOCA, Prins Bernhard Cultuurfonds Caribe y Oficina di Monumento di Aruba.
E ekipo di MANA ta conciente cu e trabounan di mantencion y e cambionan menciona por trece incomodidad pa nos bishitantenan, pa cual nos ta pidi comprension. E exposicion permanente cu temanan arkeologico ta keda accesibel di dialuna pa diabierna di 9am pa 5pm. Un y tur ta keda bon bini na MANA na Schelpstraat 42, no mas cu lo mester tene cuenta cu e situacion actual.
