Asina cu bo ta sinti, cosnan cu tin bo mara, manera envidia,jaloersheid, murmuracion, falta di confiansa, mal comportacion, expresion di palabra malo, duda, mentira, trosemento di palabra, falsedad,rechaso,falta di pordon, sabi cu eynan no tin libertad, pasobra e Spirito di Dios no ta move den e cosnan ey. Pasobra e cosnan ey ta trece presencia di spirito impuro den bida di hende.
Galationan 5 :13 ta splica nos bon cla lo siguiente: Pasobra boso a wordo yama pa libertad, rumannan , solamente no usa boso libertad como oportunidad pa e carni, ma laga un sirbi otro pa medio di amor.
Caminda tin amor berdadero tin confiansa,pasobra e amor berdadero ta bini di Senjor, pasobra den e amor berdadero no tin falsedad, no tin envidia, no tin duda, asina cu duda presenta meymey di un matrimonio, of amistad, e Spirito di Dios ta move y desconfiansa ta drenta, y discucion ta drenta.
Bo ta imagina bo, hende cu ta biba hunto, ta bisa cu nan ta stima, pero e desconfiansa cada rato ta bati, na porta, den e telefon, den e whatsup, por poco kier kibra cabes pa sa ken a yama otro of kico e persona ta ricibi den su telefon.
Ta ken por biba un bida asina? Awel esey ta e bida di control cu hopi hende ta hibando, pesey tin hopi stress, tin hopi depresion, pasobra e libertad cu e Spirito Santo di Dios ta duna, no tey, pasobra su presencia no tey.
Galationan 5:1 ta para scirbi: Ta pa libertad Cristo a haci nos liber, pesey keda para firme y no sea someti atrobe na un yugo di sclavitud.
Tin hopi biaha hende kier controla otro pasobra nan kier esclavisa otro, pa motibo cu nan mes ta mara na enividia, jaloersheid y falta di pordon.
Ora nos a bini na Cristo nos ta bandona e bida bieu cu tur su bagamunderia carnal, pasobra den Cristo Hesus nos tin libertad, ya nos no ta biba mas bao di dominio di scuridad, tur cos bieu a pasa y a wordo haci nobo, y si Cristo a haci nos liber nos no por permiti ningun hende ,ningun situacion, ningun amistad, hiba nos bek den e yugo di sclavitud di pasado.
Pasobra e ley di e Spirito di bida den Cristo a haci mi liber di e ley di pica y di morto.( Romanonan 8:2).
Pasobra e mente fiha riba e carni,ta morto, ma e mente fiha riba e Spirito ta bida y pas, pasobra e mente fiha riba e carni ta enemistad cu Dios , pasobra e no ta somete su mes na e ley di Dios, como cu e no ta capas pa haci esey tampoco, y esnan cu ta den carni no por agrada Dios.( Romanonan 8:6-8).
Si un hende tin un problema y e ta rabia cu esun cu por sake for di e problema, ta dificil pa e hanja libertad for di su problema, si un hende ta den rebeldia, y e no kier scucha palabra di Dios, e enemigo ta probecha pa mara e persona ey , pasobra e no kier somete na Dios, pasobra e palabra di Dios ta bisa bon cla: Pesey somete boso na Dios, resisti e diabel y e lo huy for di boso.Hala serca Dios y E lo hala serca boso.( Santiago 4:7-8).
Curason di hende no a wordo traha pa warda maldad, envidia y falta di pordon, e a wordo traha pa Dios por goberna nos bida den dje, asina cu nos ta yena nos curason cu nos cu no ta di Dios, nos tin stress.
Sinceramente, Pastor Marcel Balootje
