Dios ta avisa nos den Su palabra, cu nos tur mester pordona otro, cu nos no por ta biba den gera cu otro, cu bista riba pasado yen di rabia , rencor y amargura pasobra palabra di Dios ta ordena lo siguiente:
Aspira pa tin pas, cu tur hende y tambe santificacion , sin cual ningun hende lo no mira Senjor.
( Hebreonan 12:14).
Si ta posibel asina cu ta depende di boso,sea na pas cu tur hende, nunca paga malo cu malo cu ningun hende. Respeta loke ta corecto den bista di tur hende.( Romanonan 12:17-18).
No laga ningun palabra danino sali for di boso boca, solamente palabra cu ta bon pa edificacion, conforme e necesidad di e momento, pa esaki por duna gracia na esnan cu ta tende.( Efesionan 4:29.
Y no haci e Spirito Santo di Dios tristo, pa medio tristo pa medio di Kende boso a wordo seya pa e dia di rendencion.( Efesionan 4:30).
Laga tur amargura, rabia, furia,griteria,y calumnia wordo kita for di boso, hunto cu tur malisia.( Efesionan 4:31) Y sea carinjoso cu otro, misericordioso, pordonando otro, mescos cu Dios den Cristo a pordona boso.
Den mundo tin hopi conflicto, hopi rabia , hopi odio, e enemigo ta haci fiesta cu mente y bida di hende,y hende ta acepta pa falta di conocemento, of pa motibo di rencor, cu nan no kier laga pasado bay y asina biba na pas.
Ta con por ta posibel cu e siman aki bo ta pordona, y otro siman bo ta lanta cu mesun cos bek?
Acaso ta normal pa un hende tuma un bon banjo y depues bolbe bisti e mesun panja sushi bek?.
Dios ta demostra hopi cla den su palabra, cu e ta pordona y no ta corda mas riba nos pica, bisando den Hebreonan 8;12, Pasobra lo Mi tin misercordia di nan inikidatnan, y lo Mi no corda nan pica mas.
Ta para scirbi den Mateo 6;14, pasobra si boso pordona hende nan transgreshonnan , boso Tata celestial tambe lo pordona boso. Ma si boso no pordona hende, boso Tata tampoco lo no pordona boso transgreshonnan.
Nos mester tin e naturalesa di Cristo, esey ta nifica cu nos ta pordona, pasobra Cristo Hesus a muri pa pordon di nos picanan, si nos ta bisa cu nos no ta pordona, of ta pordona y no ta lubida, esey ta nifica cu te ainda e naturalesa di Cristo no a alcansa nos bida, esey ta nifica cu te ainda nos no a laga pasado bay.
Y esey no ta nada di broma cune: Pasobra ora nos pordona, nos ta liber, spiritual y mental, y nos curason ta na pas, y nos consenshi ta limpi, esey ta nifica cu nos ta obedece Dios, ya ta bon pa nos mes.
E oracion di Nos Tata ta sinja nos cu nos mester pordona, awor tur hende ta resa Nos Tata , ma no ta tur hende kier pordona, esey ta nifica cu no tin obediencia na Dios.
Si un hende kier pas, Cristo Hesus ta ofrece pas, pero no e pas temporal cu mundo ta duna, pero Cristo Hesus ta ofrece pas eterno.
Hende ta cana rond cu gana di bringa, cu odio, planea pa destrui otro, cu curason yen di vengansa, buscando otro pa kibra, teniendo goso di otro su dolor, pero Dios den su misericordia,ta pordona nos pa asina nos por biba na pas un cu otro.
Falta di pordon , ta putri hende su curason, ta pone organo den curpa di hende funciona deficiente, ta afecta hende su salud mental.
Biba den e amor di Dios.
Sinceramente, Pastor Marcel Balootje
