Y esaki ta e mensahe cu nos a tende di dj’E y ta anuncia na boso, cu Dios ta lus y den dj’E no tin nada, nada di scuridad. Si nos bisa nos tin comunion cun’E y sinembargo, nos ta cana den scuridad, nos ta gaña y no ta practica e berdad, ma si nos ta cana den lus, mescos cu E mes ta den lus, nos tin comunion cu otro, y e sanger di Hesus, Su Yiu ta limpia nos di tur pica.( 1 Juan 1:5-7)
Scuridad ta aumentando riba mundo, y ta hala hopi hende bay cune, hopi ta den scuridad di droga, alcohol, inmoralidad, materialismo, bruheria, violencia,adulterio, y awor mas cu nunca falta di temor di Dios.
Falta respet, bida di impuresa, rechaso di Dios, hende ireconciliabel, cu no kier pordona, of cu ta bisa mi ta pordona , ma mi no ta lubida, ta cosnan cu ta pasa henter dia, no ta algo nobo mas, pero hende ta lubida cu e palabra di Dios ta bisa den Mateo 6:14: Cu si nos no pordona otro Dios tampoco ta pordona nos. Den un palabra bisa nos no por pone condicion pa Dios na e momento di pordona.
E lus di Dios ta trece:
Comunion cu Dios y hende,
Crecemento Spiritual,Guia y direccion di bida,
Libertad di pica,
Bendicion y Favor di Dios.
E lus di Dios den nos bida,ta sali na cla den nos actitud, expresion,conducta,proposito. karakter, integridad, pero mas cu tur cos den nos oracion y nos alabansa y reverencia na Dios.
Ora nos ta cana den lus di Dios nos ta;
Glorifica Dios, ( Mateo 5:14-16).
Nos ta haci bon uso di nos tempo ( Efesionan 5:14-16).
Nos ta expone tur malicia y maldad y cosnan di scuridad. ( Efesionan 5:11).
Nos lo tin recompensa den cielo .(Revelacion 22:12).
Ta pa motibo di scuridad cu tin riba mundo henter, hende a perde consenshi y nan mes ta aproba nan derechi di mata y destrui nan prohimo, y ta algo cu ta sosode diariamente, vengansa a bira algo normal, y paisnan kier destrui otro caba cu poblacion completo.
Mescos cu den nos bida social, tin hopi hende cu pensamento cu mas inmoralidad, malicia y abominacion mester wordo aproba, pasobra nos ta bibando den e ultimo temponan, y tur e cosnan aki, mester pasa segun Scritura ta bisa, pa nos por compronde cu e Binida di Cristo Hesus ta cerca.
Ta parce manera hende ta odia decensia y respet, pero Apostol Pablo a adverti nos bisando: Tur esnan cu kier biba un bida santo den Cristo Hesus,lo wordo persigi ( 2 Timoteo 3:12).
Pero tambe e a alerta nos di e cu hendenan malbado,y gañadornan lo bay di malo pa peor ,gañando y siendo engaña. ( 2 Timoteo 3:13).
Dios den su inmenso misericordia a provee un salida pa nos bisando; Si nos confesa nos picanan, E ta fiel y husto pa pordona nos, nos picanan y limpia nos di tur inhusticia. ( 1 Juan 1:9).
Ta tempo pa hende kere den Cristo Hesus, acepta Cristo Hesus como Señor y Salbador y asina sali for di bao di condenacion di scuridad di mundo.
Ami ta e lus di mundo, esun cu sigi Mi lo no cana den scuridad,ma lo e tin e lus di bida.( Juan 8:12).
Mientras Mi ta den mundo Mi ta e lus di mundo ( Juan 9:5).
Bo palabra ta un lampi pa mi pia, y un lus pa mi caminda.( Salmo 119;105).
Maske cuanto scuridad y maldad ta aumenta,ban sigi E lus di Hesus.
Sinceramente,Pastor Marcel Balootje
