Tin hopi caminda ta parce bunita, parce bon, parce alegre, tin yen di amistad,pero e caminda ey ta hiba na perdicion.
Tin biaha un mentira ta asina nechi empaketa cu e ta parce berdad, y nos tin di lanta nos hobennan cu e berdad, pa asina evita cu nan ta cay den e trampa di e enemigo.
Cana den e lus di Cristo Hesus ta nifica cana den e boluntad di Dios, pasobra solamente eyden no tin proteccion. E palabra di Dios ta bisa,: Ma si nos ta cana den lus, mescos cu E mes ta den lus, nos tin comunion cu otro, y e sanger di Hesus, Su Yiu ta limpia nos di tur pica. ( 1 Juan 1;7).
Si bo por tin un amistad cu ta conseha bo pa cana temporalmente den scuridad, pasobra nada no ta bay pasa, esey no ta un amistad berdadero.
Si bo por tin un amistad cu ta invita como bon amigo pa bo participa den inmoralidad, e amigo no ta berdadero. E ta ciego, y e kier guia bo den caminda di scuridad caminda boso dos lo cay hunto.
Ami ta e lus di mundo, esun cu sigi Mi lo no cana den scuridad, ma lo tin e lus di bida.
E lus di bida den nos cu ta Cristo Hesus, ta trece fruta diferente for di ora nos ta cana den scuridad.
Algun cos cu e ta kita for di nos ta malbeis, papia palabra malo, zundramento, jaloersheid, envidia,rabia, falta di pordon, tur esaki nan e lus di Cristo ta kita, pasobra e lus ta trece amor y ta sinja nos stima nos prohimo.
Pa poco tempo mas e lus ta meymey di boso. Cana mientras cu boso tin e lus,pa scuridad no sorprende boso, esun cu ta cana den scuridad no sa na unda e ta bay. Mientras boso tin e lus cana den e lus pa boso por bira yuinan yiunan di lus.( Juan 12:35).
Ningun hende cu ta cana den e lus no ta conseha ningun otro persona pa cana den scuridad, pasobra e amor di Dios, ta lus di Dios, ta claridad di bida, ta fuente di salbacion y bida eterna.
Pasobra antes boso tabata cana den scuridad, ma awor boso ta lus den Senjor, cana como yiunan di lus( Pasobra e fruta di e lus ta consusti di tur bondad y humildad y berdad) Tratando di sinja loke ta agradabel na Senjor, y no participa den obranan infructifero di scuridad, sino mas bien expone nan.( Efesionan 5:9-11).
Dios ta lus y den dj’E no tin nada , nada di scuridad. Esun cu ta bisa cu e tin comunion cu Dios y e ta cana den scuridad, e ta ganja y no ta practica e berdad.
Shonnan Dios ta yama nos pa cana den lus constantemente, y no temporalmente, pasobra nos ta yiu di Dios 24/7 y Dios ta nos Tata 24/7. E a priminti di nos bandona nos , y ni tampoco laga nos desampara.
Esun cu bisa cu e ta den lus y sinembargo ta odia su ruman ta den scuridad te ainda.Esun cu ta stima su ruman ta permanece den lus y no tin motibo den dje pa trompica.Ma esun cu ta odia su ruman ta den scuridad y ta cana den scuridad, y e no sa unda e ta bay, pasobra e scuridad a ciega su wowonan.
Pasobra Bo ta sende mi lampi, Senjor mi Dios ta ilumina mi scuridad.( Salmo 18:28).
Laga nos pone e obranan di scuridad un banda y bisti e amrmadura di lus.( Romanonan 13:12).
Sinceramente,Pastor Marcel Balootje
