Riba 13 di juni 2024, Algemene Rekenkamer Aruba a publica un rapport titula “Op afstand, maar toch dichtbij” tocante e institucionnan cu ta opera na distancia di Pais Aruba.
Algemene Rekenkamer Aruba a inclui den su raport un analisis di Fundacion Lotto pa Deporte (‘FLPD’). E rapport a inclui declaracionnan referente na Canadian Bank Note Company, Limited (‘CBN’), Canadian Bank Note (Aruba) N.V. (‘CBNA’), y e management agreement cu tawata vigente entre e CBN, CBNA y FLPD na momento di publicacion. Algemene Rekenkamer Aruba no a verifica e declaracionnan aki cu CBN ni cu CBNA.
E rapport ta crea e impresion cu e sumanan cu CBN a cobra FLPD tawata inhusto. Un lesado lo conclui cu e sumanan aki tawata neto, siendo cu en realidad nan tawata cubri e gastonan operacional di e loteria den su totalidad, incluyendo por ehempel gastonan di salario, huur, mercadeo, y tecnologia. E ta desafortunado cu un institucion manera Algemene Rekenkamer Aruba lo haci declaracionnan asina, sin auditoria si nan ta berdad.
E rapport di Algemene Rekenkamer Aruba ta laga e impresion cerca su lesadonan cu CBN tabata cobra sumanan excesivo y cu esaki a causa deporte pa ricibi menos fondo cu e mester a ricibi. E realidad ta lo contrario. E loteria y e ingresonan disponibel na deporte a crece dramaticamente bao di e maneho di CBN y CBNA. Ningun di e dos companianan aki ta responsabel pa distribui e fondonan na e bon causanan pa cual nan ta intenciona. E responsabilidad aki ta sinta cu FLPD y e federacionnan deportivo cu FLPD ta financia.
E rapport tambe ta declara eroneamente cu e perdida di visibilidad y control riba e distribucion di fondo di FLPD lo a wordo causa parcialmente pa e subcontratacion di e maneho di e loteria na CBN y CBNA na 2012. E berdad ta cu e contract a percura pa transparencia total y reunionnan cada kwartaal pa duna cuenta riba e estado di e negoshi, locual semper a cumpli cun’e.
Pa loke ta trata e declaracionnan referi aki riba, e rapport no ta yega cerca di cumpli cu e standardnan cu lo por spera di un auditor. No obstante esaki, Algemene Rekenkamer Aruba a nenga e peticion di CBN y CBNA pa clarifica cu e la haci e declaracionnan aki sin studia e cuentanan anual di CBNA of CBN – cual ta wordo audita anualmente pa oficinanan di accountant di renombra – of combersa cu ningun persona na CBN of CBNA, prome cu emiti su rapport.
CBN y su ekipo di Rubiano na CBNA ta hustamente orguyoso di e exito den recauda decenas di miyones di Florin pa FLPD y su mandato pa aporta na deporte di Aruba durante e periodo na cual e rapport di Algemene Rekenkamer Aruba ta referi.
