Cancer di prostata ta keda un di e tiponan di cancer mas comun entre hombernan na mundo y den Caribe. Maske e ta un malesa cu por wordo trata y cura exitosamente si e wordo detecta na tempo, hopi homber ta ricibi e diagnostico ora cu e cancer ya a avansa demasiado. Especialistanan di salud ta haci un yamada di conscientisacion pa kibra e tabunnan rond di e malesa aki y pa hombernan haci uso di e test di sanger di PSA.
Kico ta e prostata y kico ta e test di PSA?
E prostata ta un klier chikito cu ta forma parti di e sistema di reproduccion di e homber. Su funcion principal ta pa produci e liquido cu ta nutri y transporta e sperma.
E Test di PSA (Prostate-Specific Antigen) ta un simpel test di sanger. E test aki ta midi e nivel di un proteina cu e klier di prostata ta produci. Un nivel abou di PSA den sanger generalmente ta indica cu e prostata ta den bon condicion. Un nivel mas halto por ta un senal di advertencia, mas no ta nifica automaticamente cu e persona tin canser, paso e por ta causa tambe pa un inflamacion o un grandimento benigno di e klier.
Dicon hopi homber ta yega dokter demasiado lat?
Segun dokternan y urologonan, tin varios factor cu ta haci cu hombernan ta tarda pa busca ayudo medico:
Falta di sintoma den e prome fase: Den e prome etapanan, cancer di prostata casi nunca ta duna dolor ni molestia. Ora cu un homber cuminsa sinti dolor di lomba, dificultad pa orina o sanger den orina, e canser por a plama caba for di e prostata.
Tabu y miedo di e examen fisico: Hopi homber ta evita e check-up pa miedo o berguensa di e examen fisico. Maske e test di sanger PSA ta e prome paso cu e dokter ta pidi, e temor di e check-up completo ta stroba hopi di bai dokter.
E mentalidad di “mi no ta sinti nada malo”: Tradicionalmente, hopi homber ta bay dokter solamente ora nan ta sinti dolor fuerte o ta hopi malfido, olvidando cu prevencion ta e yabi pa salba bida.
Ki ora un homber mester haci e test?
Organisacionnan di salud y urologonan ta recomenda pa hombernan cu un riesgo general cuminsa papia cu nan dokter di cas di e test aki ora nan cumpli 50 aña.
Pa hombernan cu un riesgo mas halto, manera esnan cu tin historia di canser di prostata den familia o esnan di origen Africano, e recomendacion ta pa cuminsa cu e screening aki mas trempan, for di 40 pa 45 aña.
Deteccion trempan ta salba bida
Ora detecta canser di prostata na tempo, e probabilidad di sobrevivencia ta mas cu 99%. E opcionnan di tratamento den e fase aki ta mas amplio y tin menos impacto riba e calidad di bida di e pasiente. Dokternan ta urgi tur homber pa tuma nan salud den nan propio man: un simpel prik di sanger por haci e diferencia entre un bida largo y un diagnostico lihe.
