Door di combersa cu nos maestro y docentenan nos ta realisa varios di nan ta hopi cansa y otronan preocupa cu e situacion den enseñansa. Klasnan cu tin hopi studiante y cu tin un diversidad enorme den nan necesidad. Esaki ta trece diferente reto pa un maestro of docente. Maestronan y docentenan mester haci hopi trabou administrativo y recaudacion di fondo cu ta limita nan pa prepara nan lesnan debidamente. Falta di liderazgo riba diferente nivel pa e maestro y docente por crece profesionalmente y mehora enseñansa. Falta di incentivo pa motiva nan. Esaki ta algun reto cu nos maestronan y docentenan ta confronta den nos enseñansa. Consecuentemente e retonan aki ta trece desmotivacion y esaki tin su consecuencia pa e studiante y su siñamento.
PPA den gobierno lo traha pa e maestronan y docentenan haya nan pasion y motivacion bek. Lo percura pa e recusonan y instrumentoman necesario pa tene bon cuenta cu e diversidad den klas.Tambe lo percura pa inverti den bon liderazgo. PPA lo percura pa nan por haya oportunidad pa desaroya continuamente. Structuralmente nos lo traha hunto cu directivanan di scol, sindicatonan y departamentonan di gobierno concerni pa den un forma colaborativo y di respet nos logra esaki. Banda di desaroyo continuo di e maestro y docente, lo percura pa e desaroyonan aki ta basa riba nan necesidad profesional. Di e forma aki nos ta empodera e maestro, docente y directivanan di scol pa hunto traha na calidad di enseñansa. Un enseñansa caminda e maestro ta ekipa cu competencianan necesario pa yuda e studiante siña miho. Un enseñansa caminda e maestronan y docentenan ta determina y ta convenci cu nan por haci un diferencia den e siñamento di e studiantenan. Cu e meastronan y docentenan por haci esaki hunto cu otro. Cortico bisa percura pa e conexion entre e studiante y maestro/docente ta central.
