Caribbean Journalism Seminar 2026 a enfoca riba Innovacion y AI den periodismo

Cu e meta di brinda periodista conocemento y habilidadnan practico pa nan por integra inteligencia artificial den nan trabou di un manera consciente y responsabel, Red Arubiano di Prensa Profesional (RAPP) a organisa su di tres edicion anual di Caribbean Journalism Seminar. E programa di tres dia, cu a tuma luga di 25 pa 27 di september, tabatin como tema Innovations & AI in Journalism.

E combinacion di un anochi di presentacion y dialogo, sigui pa dos workshop practico, a contribui na un seminario exitoso den cual conocemento y practica a bin hunto. Participantenan no solamente a haya mas informacion tocante e posibilidadnan cu AI ta ofrece periodismo, sino nan a haya tambe e oportunidad pa traha nan mes cu e tecnologia y explora con nan por aplic’e den nan trabou diario.

Inteligencia artificial ta transformando periodismo na un ritmo rapido. AI por yuda periodista y redaccionnan procesa y analisa informacion, verifica dato, crea formato nobo y traha di un manera mas eficiente. Pero uzo di AI ta trece tambe preguntanan importante tocante confiabilidad, privacidad, transparencia, responsabilidad editorial y e proteccion di fuente.

Pa RAPP, ta importante pa periodistanan no solamente siña con pa uza e tecnologia, sino tambe compronde unda su limitacionnan ta. Un resultado produci pa AI por parce convincente sin ta completamente corecto. P’esey, criterio humano, pensamiento critico y verificacion ta keda indispensabel. E responsabilidad final pa e informacion cu wordo publica no ta cerca e sistema di AI, sino cerca e periodista y e redaccion cu ta haci uzo di dje.

E seminario a inicia diabierna 25 di september na unda Rodolfo Rodriguez, Digital Strategist & Developer, a presenta con periodista y otro profesional den media por haci uzo di Claude. Vincent Smit, hefe di redaccion di e medio Hulandes 1Almere, a papia tocante vibe coding den sala di redaccion y con periodista por uza AI pa crea nan propio hermentnan y prototipo. Noel Algarín-Martínez, editor na Centro de Periodismo Investigativo di Puerto Rico, a enfoca riba e dimension etico di AI y e importancia di mantene criterio humano den periodismo.

Diasabra 26 di september, e programa a continua cu e workshop AI Essentials for Journalists, facilita pa Laurens Ras, Chief Automation Officer. Durante e workshop, participantenan a siña con pa configura ChatGPT of Claude basa riba nan propio trabou, fuentenan y estilo di skirbi, pa e resultado no ta generico, sino refleha mihor e stem y contexto di e periodista.

Diadomingo 27 di september, Vincent Smit a facilita e workshop Vibe Coding in Practice. Participantenan a explora con nan por transforma un idea periodistico den un prome prototipo cu ta funciona, hasta sin experiencia anterior cu programming. Asina nan por pensa riba aplicacionnan manera formato interactivo, herment pa envolvi audiencia, solucionnan pa sala di redaccion y forma nobo di conta storia.

E tres dianan a mustra cu innovacion den periodismo no ta trata simplemente di adopta e tecnologia mas nobo. E ta trata di sa pakico, con y den ki momento pa uza e tecnologia, y di sigui cuestiona e resultado. Especialmente den un profesion cu ta basa riba verificacion, independencia y responsabilidad publico, etica mester forma parti di cada decision tocante uzo di AI.

Caribbean Journalism Seminar 2026 tabata posibel danki na e sosten di Aruba Tourism Authority, WEB Aruba N.V., Hyatt Place Aruba Airport, Ministerio di Asuntonan Interior y Relacionnan den Reino Hulandes, SETAR y Aruba Airport Authority.

Cu e seminario y workshopnan aki, RAPP kier crea espacio pa periodistanan topa otro, comparti conocemento, inspira y sostene otro, y sigui desaroya y profesionalisa nan mes. Di e forma aki, nan por eherce nan trabou mihor y contribui na un periodismo mas fuerte na Aruba y den region.