Caribbean Mercantile Bank (CMB) N.V., den colaboracion cu CEDE ARUBA y e Instituto pa Good Governance y Liderato (GG&L) di Universidad di Aruba, ta anuncia cu e HEART + KNOWLEDGE: Non-Profit Leadership & Governance Conference 2025 lo tuma lugar dia 27 di september 2025 na Hyatt Regency Aruba, di 8:30 AM te 4:30 PM.
E conferencia ta dirigi pa fortifica e rol vital cu organisacionnan non-profit tin den nos sociedad. E motibo principal pa organisa e conferencia unico aki, ta pa fortifica liderato y bon gobernanza, pa stimula colaboracion, y pa crea un ecosistema non-profit mas resiliente y sostenibel.
E conferencia lo inclui sesionnan inspiracional y practico cu oradornan di nivel local, regional e internacional. Keynote Speaker: Dr. Michael D. Layton di Dorothy A. Johnson Center for Philanthropy cu lo bin for di merca, e lo elobora ariba e ecosistema global di non-profit y filantropia.
Nos lo tin workshops tambe:
Board Governance – Hellen van der Wal & Robbert Kroon
Innovative Funding & Business Models – Gyonne Zafira & Edward Erasmus
Inspirational Talk: José Sommers (Foresee Foundation di St. Maarten) cu lo papia ariba resiliencia y innovacion den liderato non-profit.
Durante e interactive session, esaki lo wordo dirigi door di Thaïs Franken y CEDE ARUBA cu partnernan, cu e meta pa co-crea contenido pa crea capacidad den futuro.
E programa tambe lo brinda momento di networking pa stimula colaboracion entre organisacionnan presente.
Segun CMB “Ora nos NGO’s ta mas fuerte, henter comunidad ta beneficia di esaki.” “Tambe nos ta kere cu transparencia, liderato y integridad ta fundamental y esencial pa logra confianza, sea pa un banco of pa un organisacion non-profit.” Apoyando e conferencia, CMB ta enfatisa nan compromiso pa eleva nivel di bon gobernansa y transparencia.
Detayes di Conferencia
Fecha: 27 di september 2025
Lugar: Hyatt Regency Aruba
Hora: 8:30 AM – 4:30 PM
Costo di inscripcion: Afl. 50 (inclui 2 representante pa cada organisacion)
Espacio talimita: maximo 100 participante
Registracion ta posibel via e pagina di Facebook di Caribbean Mercantile Bank y CEDE ARUBA. Prioridad lo wordo duna na e organisacionnan cu a ricibi invitacion di CEDE ARUBA, pero tambe lo tin un lista di espera.
Invitacion
Nos ta invita tur organisacion y fundacion non-profit pa tuma parti den e oportunidad unico aki. E conferencia ta uni Heart + Knowledge, pasion pa comunidad cu habilidadnan profesional, pa logra un Aruba mas fuerte, inclusivo y sostenibel.
