Caribbean Mercantile Bank N.V (CMB) y su compromiso pa cu bienestar di nos comunidad, su empleadonan y miembronan di Club di Ciclismo di San Fuego (SFCC) recientemente a recauda fondo den beneficio di Brighter Future Academy Foundation cu nan obhetivo di brinda oportunidadnan igual di educacion na personan cu diferente limitacionnan mental y neurologico riba e isla di Aruba.
Diamars atardi, directiva y empleadonan di Caribbean Mercantile Bank, conhuntamente cu organizadornan di e evento di e bike-a-thon a haya un recorido di Bright Future Academy na unda nan por a haya sa mas di e activadnan y impacto cu e fundacion ta brinda. Aki den presencia di director di Caribbean Mercantile Bank N.V. Sr. Paul DeWolfe y demas miembronan di gerencia a haci un donacion di Afl.10.000,00 na Brighter Future Academy. Un suma di cual a wordo recauda den kilometer, y di cual gerencia mirando a trabou noble haci di e fundacion a dicidi di “match” esaki.
Fondonanan recauda di e evento deportivo ta pa cubri gastonan di servicionan profesional multiple, debi na e diferente variedad limitacionnan mental y neurologico di e alumnonan. Tambe fondonan lo wordo aloca pa brinda beneficionan necesario na mayornan di cliente cu limitacionnan financiero.
Brighter Future Academy ta un fundacion cu ta depende di 100% di contribucionnan di persona- y entidadnan priva pa por brinda su alumnonan programanan di educacion, como cuido y terapianan cu ta rekeri diferente specialista, terapistanan y continuidad operacional.
