Parlamentario di AVP Carlos Bermudez, cu hopi hende toch tabata tin respet p’e, ya a cuminsa cansa hende cu e mesun cantaleta.
Hende no kier sa kico Evelyn a firma, tur hende sa kico Evelyn a firma y tur hende sa kico Gerlien y Mike a firma.
Evelyn a firma un BESTUURLIJK ACCOORD 2024 di 2 pagina. Gerlien y Mike a firma un RIJKSWET HOFA di 50 pagina. Tur hende sa esey. Nan firmanan ta riba papel.
Loke hende kier sa ta unda Carlos Bermudez MES ta para. Bo no a lesa e ley ainda? Bo no a compronde ainda? Bo mes no por saca bo conclusion? Bo mes no por busca conseho? Stop di sconde bou saya di Evelyn, cuminsa sali dilanti y bisa kico ABO ta para p’e.
Diferencia GRANDI entre loke Evelyn a firma, y loke Gerlien y Mike a firma.
Evelyn a firma pa cuminsa negocia. Gerlien y Mike a completa e negociacion. Loke tin awor riba mesa NO ta bon pa Aruba, Aruba no por sali nunca mas di dj’e, e ta contra Constitucion di Aruba y pa colmo e no ta necesario tampoco.
Evelyn mes a bisa: si ta e a wordo presenta cu loke tin awor riba mesa, e lo a rechasa esaki y bisa Hulanda “NOS MES POR”.
Carlos Bermudez ta di mesun opinion?
