Carnival Cruise Line, via su barco Carnival Conquest, a reafirma su compromiso cu comunidad di Aruba por medio di un donacion di 15 cuna na Stichting Casa Cuna Progreso. Riba 22 di januari a entrega e donacion oficialmente na Aruba durante un ceremonia special.
Presente tabata representante di Aruba Tourism Authority (A.T.A.), Aruba Ports Authority N.V. (APA NV) y Stichting Casa Cuna Progreso. APA NV tabata representa pa CEO, Marc Figaroa y Chief Commercial Officer Mario Arends, mientras cu Cruise Manager, Monica Bos, tabata presente representando Aruba Tourism Authority. Jessica Canhigh, Directora di Stichting Casa Cuna Progreso, a ricibi e donacion na nomber di e organisacion.
E contribucion generoso aki ta parti di e esfuerso continuo di Carnival Cruise Line pa duna bek na comunidad cu e ta sirbi. E compania a expresa su intencion pa sigui sostene iniciativanan local y crea impacto positivo den futuro. Un reconocimento special ta bay na Port Agency S.E.L. Maduro & Sons pa nan asistencia valioso den e coordinacion di transporte y documentacion di e cunanan, sigurando un entrega exitoso.
“Nos ta hopi agradecido cu Carnival a pensa riba Aruba un biaha mas y a inclui nos den su programa di duna bek,” a comparti esnan presente. “E iniciativa aki ta refleha un relacion fuerte basa riba respeto mutuo, colaboracion y compromiso comparti pa sostene comunidad.”
E donacion di e cunanan lo beneficia Stichting Casa Cuna Progreso directamente pero tambe ta fortalece e relacion duradero entre Carnival Cruise Line y Aruba.
