Fundacion Salvaguardia e Herencia Cultural di Aruba (FSHCA) kier a invita Aruba completo pa e celebracion di nos 50 aña di Himno y Bandera y nos 40 aña di nos Status Aparte.
E actividad aki ta na San Nicolas y tin e titulo di Carrousel Cultural, cu ta fortifica e lasonan cu nos gruponan multicultural cu ta biba na Aruba. Nos ta manera un Carrousel cu tin diferente aspectonan, pero toch nos ta drey hunto pa e progreso di nos pais.
Dia 15 di maart, un diadomingo di famia, nos di FSHCA, lo trece un show di Arte y Cultura di kita sombre na Centro di Bario Lago Heights. Orario lo ta di 10am pa 5pm. Entrada ta gratis.
Lo tin diferente gruponan di baile local y multicultural manera Gucci Dancers, Club di Movimiento, Saniflow dancers, Agrupacion Danzarte Venezuela, Grupo di Baile di Centro di Bario Savaneta, Grupo Associacao Social Cultural, Grupo di Baile Dabaruida, Folklor Dominicano, Expresion Folklorico Casas de Colombia, Takiri Peru y Grupo di Baile di Mimi Kock. Lo tin baile di cinta di palo como tambe baile di quadrille cu ta un baile cu lo rescata bek y hancr’e den nos Folklore.
Lo tin presentacion teatral di grupo di Teatro Senguene, poppenkast y declamacion di poesia di Jhon Freddy Montoya.
Tambe lo tin cantantenan manera Whitney Nin, Jyvion Besselink, Stephanie Quant. Caha di Orgel Mi Amor, Tipico Colegio Arubano, Tradicion Musical y Tipico Stimami.
Nos bar y cushina lo ta bon surti cu cuminda crioyo, sopi, cos dushi y hopi mas.
Tur persona ta invita pa bin celebra hunto nos identidad, nos cultura, nos orguyo di a nace y ta biba na un isla bendiciona cu yama Aruba.
