E carta di sindicatonan, e tono cu ta skirbi e carta ta parce uno ‘egoista’ y sin comprencion pe realidad cu nos a pasa aden. Un solidaridad ficticio cu ‘malas ganas’. SOLO DI PUEBLO ta kere cu e pueblo cu a pasa den crisis di pandemia, merece mas respet si di lidernan sindical. Lidernan sindical ta trece e acontesimiento dilanti, sin sentimiento. Parce cu nan no a siña nada di e pandemia.
Nan ta skirbi: “Na mei 2020, Gobierno ta hinca man den cartera di e trahadonan y ta ranca 12.6% di nan entrada pero tambe ta kita 12.6% di e cuminda for di hogarnan di un cantidad grandi di trahado. Cu e 12.6% gobierno a negocia y balora loke segun gobierno ta kere cu e trahado di gobierno merece pa biba.””Hinca man den cartera” ta sona un persona cu no a gusta cu pandemia a bati na porta y a ocaciona e crisis. Ta reclama e recorte di 12.6% cu ta un crimen a comete, lubidando cu tin hende cu a perde 100% y otro cu a perde 40%.
Tur hende a sufri, pero e lidernan sindical parce cu nan no kier a sufri. Nan ta yora awe cu a kita 12.6, cual ta parce un reclamo egoista, pasobra ta nan so kier a keda cu 100%.
Corte na Sint Maarten a dicta cu e recorte por tabata mas, y no ta disproportional mirando e crisis grave cu e islanan y mundo a pasa aden. Parce cu e lidernan sindical ta biba den otro mundo, den un mund’i fantasia.
Si nan ta asina rabia, dicon nan no a acudi na corte pa asina reclama na derecho? Nan tin miedo pa corte core cu nan?
Nos ta compronde cu nan kier nan 12.6, pero nan mester negosha na mesa y stop di haci desordo, perdiendo tempo.
Si gobierno no a elimina e 12.6, ta pasobra Gobiero kier salba nan 87.4% tur luna.
