San Nicolas / Oranjestad, 24 di juni 2025 — E polemica rond di Mike Eric de Meza ta sigui y awor cu un desaroyo nobo cu ta lanta hopi pregunta den comunidad. Den un carta dramatico manda pa Rey Willem-Alexander, un grupo di simpatisanten y sostenedor ta bisa cu “dit gaat zo ver dat wij nu ook vrezen voor de persoonlijke veiligheid van De Meza en zijn naasten”. Na papiamento: “esaki a yega asina leu cu nos awor nos ta teme pa seguridad personal di De Meza y su famia.”
Segun e carta, tin forsa politico no kier pa De Meza bira minister y ta usa tur medio pa logra esaki, incluso pone su seguridad na riesgo. Pero e gran pregunta ta: Unda e menasa ta? Unda e prueba ta?
Ningun instancia oficial, ni polis ni Ministerio Publico no a bisa cu De Meza a reporta of cu tin investigacion riba menasa pa su bida. Si e ta teme pa su seguridad y su famia, kico e ta warda pa pone un denuncia formal? Si un lider politico ta den peliger, ta su deber di tuma paso manera un ciudadano normal y busca proteccion ateaves di e via oficial.
Loke por ta pasa aki, segun hopi ta pensa, ta cu De Meza ta usa e miedo como un strategia pa cambia e atencion for di su propio problema fiscal y e investigacion penal tin contra dje. Ta hopi mas facil pa pinta bo mes como victima di un “complot” politico cu enfrenta e realidad: cu bo nombramento a para pa motibo concreto di belasting, y no pa un conspiracion di fantasia.
Un analista local a bisa: “Si e ta sinti cu su seguridad ta na peliger, laga e pone e denunciq. Si no, e tipo di palabranan aki ta solamente pa confundi pueblo y tapa su propio falta.”
Aruba ta merece lidernan honesto y transparente, no drama y miedo sin base. E pueblo ta warda prueba real, no solamente palabra.
