Como parti di su compromiso continuo pa presenta un spectrum amplio di e arte performativo, Cas di Cultura lo yama bon bini na e violinista internacionalmente conoci, Simon Gollo y e guitarista clasico premia Bokyung Byun pa un concierto special dia 11 di september proximo den Paseo Herencia Ballroom.
Como e Centro Nacional di Teatro y Cultura di Aruba, Cas di Cultura ta kere cu un comunidad cultural floreciente ta uno cu ta brasa diversidad artistico. Mientras cu e publico hopi bia ta disfruta di produccionnan contemporaneo, teater local, baile y musica popular, e organisacion tambe ta reconoce con importante e ta di crea espacio pa musica clasico—un forma di arte kende su influencia ta sigui forma musiconan y publico rond mundo.
Pa Simon Gollo, e actuacion ta marca un regreso na Aruba. Aruba por corda su aparicion na Cas di Cultura na november 2025, ora el a presenta hunto cu e Reverón Piano Trio den un concierto cu a wordo ricibi caluroso pa e publico local. E concierto di e aña aki ta mir’é regresa na e isla cu un colaboracion musical nobo, compaña pa e guitarista clasico interncionalmente conoci, Bokyung Byun.
Hunto, e duo lo presenta un programa cu ta mustra e relacion expresivo entre violin y guitara clasico. Nan presentacion ta priminti un anochi di briyo tecnico, contamento di historia musical, y dialogo artistico, ofreciendo e publico e oportunidad pa experencia musica clasico den un ambiente intimo bibo.
Door di programa presentacionnan manera esaki, Cas di Cultura ta sigui sigura cu e calendario cultural di Aruba ta refleha e rikesa y variedad di e artenan performativo mundial. Presenta artistanan di diferente tradicion musical no solamente ta amplia perspectivanan artistico pero tambe ta reforsa e rol di e teater nacional como un cas pa expresion cultural diverso.
E concierto aki ta forma parti di e vision mas amplio di Cas di Cultura pa cultiva curiosidad, encurasha aprecio pa henter bida pa arte, y percura pa Aruba su publico sigui haya acceso na presentacionnan cu ta celebra excelencia, creatividad, y e balor duradero di experiencianan cultural bibo.
Pa mas informacion di e concierto por bishita www.casdicultura.aw of sigui Cas di Cultura riba medionan social.
