Cuarenta aña ta un periodo largo den bida di un hotel, pero pa Casa del Mar Beach Resort, e ta representa mucho mas c’un aniversario. E ta historia di un resort cu a crece hunto cu e industria turistico di Aruba, y cu a bira un hogar leu di cas pa generacionnan di doñonan fiel di timeshare.
Casa del Mar a celebra su di 40 aniversario na october 2026, marcando cuater decada desde cu el a habri su portanan dia 4 di october 1986 como e di dos resort di timeshare na Aruba. E celebracion a reuni miembronan, bishitantenan, empleadonan y hendenan cu a contribui n’e historia di e resort. Gerentenan general anterior tambe a reuni pa comparti recuerdonan di nan añanan na e propiedad.
Desaroya pa Sun Development bou di e vision di Raymond Maduro, Casa del Mar tabata entre e pioneronan di timeshare na Aruba, den un epoca cu e concepto ainda tabata relativamente nobo. E idea tabata simpel, pero di gran impacto: duna famianan e oportunidad di regresa na nan isla faborito, na e mesun acomodacion, aña tras aña.
Actualmente, Casa del Mar tin 147 suite, y su historia ta refleha den e lealtad di doñonan cu ta regresa pa casi henter e cuater decada. Algun a pasa nan timeshare na nan yiunan, creando tradicionnan familiar cu ta continua cu un generacion nobo.
Durante e celebracion, tambe a reconoce e empleadonan cu nan dedicacion, a yuda mantene e resort den excelente condicion y conserva su ambiente acogedor durante tur e añanan. Ronella Croes, CEO di ATA a disfruta di haci e honornan.
Mientras e industria turistico di Aruba ta sigui evoluciona, e di 40 aniversario di Casa del Mar ta recorda nos cu hospitalidad exitoso ta bay mas leu cu edificionan y bunita localidadnan na canto di lama. Ta trata di relacionnan, recuerdonan y e hendenan cu ta haci cu bishitantenan kier regresa.
Pabien na Casa del Mar y na tur esnan cu a forma parti di su trayectoria excepcional. Cu e proximo capitulo trece ainda mas recuerdonan inolvidabel na Aruba!
